លោក​ ចាន់​ ពន្លក អភិបាលរងស្រុកកំពង់សីលាដឹកនាំកម្លាំងចំរុះចុះត្រួតពិនិត្យនឹងឆែកឆេរអាវុធជាតិផ្ទុះលើផ្លូវជាតិលេខ៤

ព្រះសីហនុ៖ លោក​ ចាន់​ ពន្លក អភិបាលរងស្រុកតំណាងលោកសៅ បុរីវឌ្ឍនៈ អភិបាលស្រុកកំពង់សិលា បានដឹកនាំកម្លាំងគណ:បញ្ជារការឯកភាពស្រុក រួមមានកម្លាំងកងរាជអាវុធហត្ថស្រុក កម្លាំងនគរបាលនៃអធិការដ្ឋាននគរបាលស្រុក នៅយប់ថ្ងៃទី១៦ខែមិថុនានេះចុះត្រួតពិនិត្យនឹងឆែកឆេរអាវុធជាតិផ្ទុះនៅចន្លោះគីឡូ១២៧-១២៨ ស្ថិតក្នុងភូមិចាំស្រី ឃុំកំពង់សិលា ស្រុកកំពង់សិលា​ ខេត្តព្រះសីហនុ។

លោកអភិបាលរងស្រុក ចាន់ ពន្លក បានអោយដឹងថា ជាលទ្ធផលកម្លាំងគណះបញ្ជាការឯកភាពស្រុកបានត្រួតពិនិត្យមានរថយន្ត ចចំនួន៩៨គ្រឿង ក្នុងនោះរកឃើញ អាវុធខ្លីចំនួន០១ដើម ម៉ាក GLOCK-19 លេខBHHY636 មានលិខិតបញ្ជាបេសកកម្មត្រឹមត្រូវ។

គោលដៅត្រួតពិនិត្យបញ្ចប់នៅវេលាម៉ោង ២៣ និង ១៥ នាទីយប់ ថ្ងៃខែឆ្នាំដដែល។

សូមរំលឹកថា,នារសៀលថ្ងៃព្រហស្បតិ៍ ២រោច ខែជេស្ឋ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៦ ខែ មិថុនា ឆ្នាំ២០២២ លោក គួច ចំរើន អភិបាលនៃគណៈអភិបាលខេត្តព្រះសីហនុ និងជាប្រធានគណៈបញ្ជាការឯកភាពរដ្ឋបាលខេត្តព្រះសីហនុ អញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ដើម្បីពង្រឹងសន្តិសុខ សុវត្ថិភាពជូនបងប្អូនប្រជាពលរដ្ឋ ដោយលោកអភិបាលខេត្តបានដាក់បទបញ្ជាយ៉ាងម៉ឺងម៉ាត់ថា,

“គ្មានការលេីកលែងជាដាច់ខាត​ ចំពោះអ្នកចរាចរណ៍​ ជួញដូរ​ ប្រេីប្រាស់​ និងផ្តល់អាវុធដោយខុសច្បាប់​ ហេីយត្រូវស្រាវជ្រាវឱ្យដល់ឫសគល់​ និងចាត់វិធានការតាមផ្លូវច្បាប់”។

គណៈអភិបាលខេត្តព្រះសីហនុ និងជាប្រធានអង្គប្រជុំ បានមានប្រសាសន៍ថា កិច្ចប្រជុំនាថ្ងៃនេះ គឺដោយផ្អែកតាមសភាពការក្រោយការបោះឆ្នោត មានករណីបទល្មើសប្រើប្រាស់អាវុធខុសច្បាប់ ការបង្ករបួសស្នាម និងក្មេងទំនើង នៅក្នុងក្រុងព្រះសីហនុ រហូតដល់សមត្ថកិច្ច បានទទួលរងរបួសស្នាមក្នុងពេលកំពុងប្រតិបត្តិការបង្រ្កាប។ សភាពការណ៍មានការប្រែប្រួលបែបនេះ ហើយ ទើបតម្រូវឱ្យមានកិច្ចប្រជុំបន្ទាន់ដើម្បីដាក់ចេញវិធានការគ្រប់គ្រងសភាពការណ៍ឡើងវិញ។ 

លោកប្រធានគណៈបញ្ជាការឯកភាពរដ្ឋបាលខេត្ត បានបញ្ជាក់ថា ការធ្វើចរាចរណ៍ លក់ដូរ និងបញ្ចេញអាវុធដោយខុសច្បាប់ ទាមទារឱ្យយើងធ្វើការស្រាវជ្រាវរកប្រភពដើម ដើម្បីឈានទៅបង្ក្រាបបានទាន់ពេលវេលា។ លោកអភិបាលខេត្តក៏បានបញ្ជាក់ជំហរយ៉ាងម៉ឺងម៉ាត់ថា យេីងគ្មានការលេីកលែងជាដាច់ខាត​ ចំពោះអ្នកចរាចរណ៍​ ជួញដូរ​ ប្រេីប្រាស់​ និងផ្តល់អាវុធដោយខុសច្បាប់​ ហេីយត្រូវស្រាវជ្រាវឱ្យដល់ឫសគល់​ និងចាត់វិធានការតាមផ្លូវច្បាប់។ 

ចំពោះមុខគណៈបញ្ជាការឯកភាពរដ្ឋបាលខេត្ត បានដាក់ចេញនូវបទបញ្ជា និងវិធានការដូចខាងក្រោម៖ 

១-គណៈបញ្ជាការក្រុងស្រុក ត្រូវរៀបចំគោលដៅបង្កើនត្រួតពិនិត្យអាវុធ ចល័តគោលដៅ និងពេលវេលា ដើម្បីទប់ស្កាត់ការនាំចូលអាវុធពីខាងក្រៅ (មិនឱ្យដាក់ប៉ុស្តិ៍ជាដាច់ខាត)។

២-ស្នងការដ្ឋាននគរបាលខេត្ត និងកងរាជអាវុធហត្ថខេត្ត បន្តការត្រួតពិនិត្យអាវុធជាតិផ្ទុះនៅក្រុងព្រះសីហនុ និងល្បាតជាប្រចាំ ដោយពាក់អាវការពារខ្លួនជៀសវាងគ្រោះថ្នាក់។

៣-ពង្រឹងការត្រួតពិនិត្យអាវុធ បើជួបករណីអាវុធដែលមិនមានលិខិតស្នាមគ្រប់គ្រាន់តាមគោលការណ៍នៃការគ្រប់គ្រងអាវុធ គឺត្រូវយកមកសួរនាំឱ្យបានច្បាស់លាស់។

៤-បន្តអនុវត្តចំពោះទីតាំងណាដែលកើតមានការប្រើប្រាស់អាវុធ ហើយសមត្ថកិច្ចបង្រ្កាបបាននៅទីតាំងនោះ គឺត្រូវអនុវត្តវិធានការរដ្ឋបាលឆែកឆេរ និងត្រួតពិនិត្យទីតាំងនោះទាំងអស់៕ដោយ៖ ចៅ ឆេះ