កម្លាំងសមត្ថកិច្ចជាង ២,០០០នាក់ គ្រោងដាក់ពង្រាយការពារក្នុងពិធីបុណ្យចូលឆ្នាំ នៅរាជធានីភ្នំពេញ

srn tv 2 weeks ago ព័ត៌មានចរាចរណ៍, ព័ត៌មានជាតិ Comments Off on កម្លាំងសមត្ថកិច្ចជាង ២,០០០នាក់ គ្រោងដាក់ពង្រាយការពារក្នុងពិធីបុណ្យចូលឆ្នាំ នៅរាជធានីភ្នំពេញ 96 Views

ភ្នំពេញ៖ កម្លាំងសមត្ថកិច្ចប្រមាណជាង ២ពាន់នាក់ នឹងត្រូវដាក់ពង្រាយត្រៀមការពារពិធីបុណ្យចូលឆ្នាំប្រពៃណីជាតិខ្មែរ។ នេះបេីយោងតាមការឱ្យដឹងពី លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក្នុងកិច្ចសម្ភាសជាមួយអ្នកសារព័ត៌មាន នៅថ្ងៃទី៧ ខែមេសា ឆ្នាំ២០២៥។

លោកឧត្តមសេនីយ៍ឯក ជួន ណារិន្ទ បានឲ្យដឹងថា គោលដៅសំខាន់ដែលត្រូវផ្ដោតការយកចិត្តទុកដាក់ជាងគេនោះ គឺនៅតំបន់រម្មណីយដ្ឋានវត្តភ្នំ ដែលត្រូវរៀបចំព្រឹត្តិការណ៍សង្ក្រាន្ដឆ្នាំ២០២៥ និងតាមបណ្ដាគោលដៅវត្តអារាម នៅក្នុងមូលដ្ឋានខណ្ឌទាំង១៤ ដែលរៀបចំសង្ក្រាន្ដ ព្រមទាំងភូមិឋានរស់នៅរបស់ប្រជាពលរដ្ឋ ផងដែរ។

បើតាមលោកឧត្តមសេនីយ៍ឯក ជួន ណារិន្ទ ក្នុងព្រឹត្តិការណ៍នេះ នឹងប្រើប្រាស់កម្លាំងសរុប មធ្យោបាយសរុប ដោយអនុវត្តទៅតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ។ ក្រៅពីការការពារសុវត្ថិភាព នៅទីតាំងសប្បាយភាពនានា កម្លាំងសមត្ថកិច្ចក៏ផ្ដោតការយកចិត្តទុកដាក់ផងដែរ លើការងារសណ្ដាប់ធ្នាប់ និងចរាចរណ៍ ដើម្បីបញ្ចៀសការកកស្ទះចរាចរណ៍នៅតាមតំបន់ប្រមូលផ្ដុំ។

លោកឧត្តមសេនីយ៍ឯក ជួន ណារិន្ទ បានសង្កត់ធ្ងន់ថា ក្នុងការងារការពារសន្ដិសុខ សណ្ដាប់ធ្នាប់ និងសុវត្ថិភាព នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៥ កម្លាំងនគរបាលរាជធានីភ្នំពេញ នឹងបង្កើនការយកចិត្តទុកដាក់ទ្វេរដងជាងបណ្ដាឆ្នាំកន្លងទៅ ដើម្បីធានាឲ្យបានទាំងស្រុងក្នុងពិធីបុណ្យនេះ និងបង្កបរិយាកាសឲ្យប្រជាពលរដ្ឋសប្បាយរីករាយ ប្រកបដោយភាពកក់ក្ដៅជាទីបំផុត៕SRN