អធិការនគរបាលស្រុកកំពង់សីលា និងអធិការនគរបាលស្រុកស្រែអំបិល សហការគ្នាករណីគ្រឿងញៀន

ខេត្តព្រះសីហន៖ ក្រោមការចង្អុលបង្ហាញពី​ ឯកឧត្តម​ ឧត្តមសេនីយ៍ឯក​ ស​ រដ្ឋា​ អគ្គស្នងការរង​ និងជាស្នងការនគរបាលខេត្តព្រះសីហនុ​ អំពីការពារសន្តិសុខ​ សុវត្តិភាពសង្គម​ និងការបង្ក្រាបក្រុមក្មេងទំនេីង​ ល្បែងស៊ីសងគ្រប់ប្រភេទ​ ជាពិសេសការចែកចាយ​ ជួញដូរ​ រក្សាទុក​ និងប្រេីប្រាស់គ្រឿងញៀនដោយខុសច្បាប់ នៅថ្ងៃទី១៣ខែមករាឆ្នាំ២០២៥កន្លងទៅនេះកម្លាំងអធិការដ្ឋាននគរបាលស្រុកកំពង់សីលា​ និងកម្លាំងប៉ុស្តិ៍រដ្ឋបាល ដឹកនាំបញ្ជារផ្ទាល់ដោយលោក​ វរសេនីយ៍ទោ​ ដូង​ វណ្ឌី​ អធិការនគរបាលស្រុក​ ចុះធ្វេីការពន្លាតដែនសមត្ថកិច្ចសហការជាមួយកម្លាំងអធិការដ្ឋាននគរបាលស្រុកស្រែអំបិល​ ដឹក​នាំដោយលោក​ វរសេនីយ៍ទោ​ ដូង​ វណ្ណា​ អធិការនគរបាលស្រុកស្រែអំបិល​  ចុះបង្ក្រាបករណី​ ជួញដូរ​ រក្សាទុក​ និងប្រេីប្រាស់នូវសារធាតុញៀនដោយខុសច្បាប់​  នៅតំបន់សេដ្ឋកិច្ចពិសេសចេជាង​ ស្ថិតក្នុងភូមិអូរជ្រៅ​ ឃុំបឹងព្រាវ​ ស្រុកស្រែអំបិល​ ខេត្តកោះកុង​។

ធ្វេីការឃាត់ខ្លួនជនសង្ស័យចំនួន​ ០៨នាក់ប្រុស ដកហូតវត្ថុតាងរួមមាន៖ម្សៅក្រាមពណ៌សថ្លាសង្ស័យជាសារធាតុញៀនចំនួន​ ២១​ កញ្ចប់,ថ្នាំគ្រាប់ពណ៌ផ្កាឈូកសង្ស័យជាសារធាតុញៀនចំនួន​ ០៥គ្រាប់,ជញ្ជីងអេឡិចត្រូនិចចំនួន​ ០២គ្រឿង,
ទូរស័ព្ទដៃចំនួន​ ០៨គ្រឿង,ដាវសាម៉ូរ៉ៃ​ចំនួន​ ០១ដេីម,សម្ភារៈវេចខ្ចប់មួយចំនួន។

បច្ចុប្បន្នជនសង្ស័យទាំង០៨នាក់រួមទាំងវត្ថុតាងត្រូវបានផ្នែកជំនាញកសាងសំណុំរឿងបញ្ជូនទៅស្នងការដ្ឋាននគរបាលខេត្តព្រះសីហនុ ដេីម្បីបន្តនិតិវិធី។

ការផលិត ចរាចរ រក្សាទុក ជួញដូរ ចែកចាយ និងប្រើប្រាស់គ្រឿងញៀនជាអំពើខុសច្បាប់៕ដោយ៖ ចៅ ឆេះ