SRNTV TV ONLINE CAMBODIA
ភ្នំពេញ៖ ជនសង្ស័យម្នាក់ ជិះម៉ូតូធ្វើសកម្មភាពឆក់កាបូបពីស្ត្រីម្នាក់បានសម្រេច ហើយព្យាយាមជិះគេចខ្លួន ក៏ជ្រុលបុកម៉ូតូ ២ គ្រឿង ទៀត បណ្ដាលឲ្យបោកក្បាលស្លាប់ខ្លួនឯងភ្លាមៗ។
ហេតុការណ៍នេះបានកើតឡើងនៅវេលាម៉ោង៧និង៣០នាទី ព្រឹកថ្ងៃ២៥ ខែកញ្ញា ឆ្នាំ២០២៣ ចំណុចក្រោមស្ពានអាកាសចោមចៅ។ ជនរងគ្រោះឈ្មោះ សាំង នីតា ភេទស្រី អាយុ៣៤ឆ្នាំ មុខរបរគ្រូពេទ្យ ស្នាក់នៅភូមិអូឌឹម សង្កាត់ចោមចៅទី៣ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុគេបានឃើញជនរងគ្រោះជិះម៉ូតូម៉ាកហុងដាវ៉េវ ពណ៌ខ្មៅ ពាក់ស្លាកលេខភ្នំពេញ 1JE 6152 ធ្វើដំណើរតាមបណ្ដោយផ្លូវជាតិលេខ៤ ទិសដៅពីលិចទៅកើត។ លុះមកដល់ចំណុចក្រោយស្ពានអាកាសចោមចៅ ស្រាប់តែមានជនសង្ស័យម្នាក់ ជិះម៉ូតូហុងដា ពណ៌ខ្មៅ ពាក់ស្លាកលេខភ្នំពេញ 1JA 6458 មកពីក្រោយធ្វើសកម្មភាពឆក់កាបូបដែលជនរងគ្រោះដាក់នៅខាងមុខបានសម្រេច ហើយព្យាយាមគេចខ្លួនឆ្ពោះទៅតាមមហាវិថីសហព័ន្ធរុស្ស៊ី។ លុះពេលទៅដល់ចំណុចភូមិព្រៃទា២ សង្កាត់ចោមចៅទី៣ ជនសង្ស័យបានបត់ឆ្លងផ្លូវ ក៏ជ្រុលបុកម៉ូតូហុងដា Beat មួយគ្រឿង ហើយបន្តទៅបុកម៉ូតូហុងដាឌ្រីមមួយគ្រឿងទៀត បណ្ដាលឲ្យរងរបួសធ្ងន់២នាក់ ចំណែកជនសង្ស័យបានបោកក្បាលស្លាប់ភ្លាមៗ។ ចំពោះក្នុងកាបូបជនរងគ្រោះ គឺបានទូរស័ព្ទមួយគ្រឿង និងលុយ៩ម៉ឺនរៀល។
ក្រោយកើតហេតុជនរងគ្រោះដែលជនសង្ស័យជិះម៉ូតូបុកឲ្យរងរបួសត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ។ ចំណែកសម្ភារៈត្រូវបានប្រគល់ជូននារីរងគ្រោះវិញ។ ដោយឡែកសពជនសង្ស័យ ត្រូវបានសមត្ថកិច្ចយកទៅតម្កល់នៅវត្តគោកចំបក់ រង់ចាំស្វែងរកសាច់ញាតិ៕
