លោកឧត្តមសេនីយ៍ទោ អ៊ុង សុភា បានច្រានចោលទាំងស្រុង ចំពោះព័ត៌មានមិនពិត ដែលចោទប្រកាន់ថាគាត់ និងឈ្មោះ ឃីន ជាមួយមេគយ១រូបរត់ពន្ធទូរស័ព្ទ!

ភ្នំពេញ៖​ បន្ទាប់ពីមានបណ្តាញទំនាក់ទំនងសង្គមហ្វេសប៊ុក និងប្រព័ន្ធផ្សព្វផ្សាយ គេហទំព័រផ្សេងៗ បានចុះផ្សាយ និងបង្ហោះ ចោទប្រកាន់ថា, ឈ្មោះ ឃីន ឈ្មោះមេគយ១រូប និងឈ្មោះ អ៊ុង សុភា រកស៊ីរត់ពន្ធទូរស័ព្ទទំនើបៗ នោះ ។ លោកឧត្តមសេនីយ៍ទោ អ៊ុង សុភា ជានាយទាហាន១រូប បានសំដែងនូវការហួសចិត្ត ចាត់ទុកថា, ជាព័ត៌មានមិនពិត ធ្វើអោយប៉ះពាល់ កិត្តិយស និងសេចក្តីថ្លៃថ្នូរ របស់គាត់ យ៉ាងធ្ងន់ធ្ងរ ហើយលោកសូមធ្វើការច្រានចោលទាំងស្រុង ក្នុងនោះលោកក៏ត្រៀម ចាត់វិធានការតាមផ្លូវច្បាប់ផងដែរ ប្រសិនបើ ការចោទប្រកាន់នេះនៅបន្តប្រព្រឹត្ត ប៉ះពាល់កិត្តិយសលោក ។ 

លោកឧត្តមសេនីយ៍ទោ អ៊ុង សុភា បានលើកឡើងថា, កុំថាឡើយដល់លោក ជាអ្នករត់ពន្ធទូរស័ព្ទដៃ សូម្បីតែឈ្មោះទូរស័ព្ទ ការប្រើទូរស័ព្ទទំនើបក៏លោកមិនស្គាល់ ពីតម្លៃបែបណាផង ហេតុអីដល់មានគេបង្កើតនូវព័ត៌មានមិនពិត ចាត់ទុកលោកជាផ្ទាំងសុីប ហ៊ានទាំងបង្កើតព័ត៌មានក្លែងក្លាយថាលោក រត់ពន្ធទូរស័ព្ទ ហើយចោទថាបន្តនាំទៅប្រទេសវៀតណាមតាមច្រកមួយចំនួន ខណៈលោកមិនដែលនឹងស្គាល់ច្រកទាំងនោះទៅវិញ ។ ម្យ៉ាងវិញទៀត លោកមមាញឹកណាស់ នឹងការងារអង្គភាព រហូតដល់ថ្នាក់រកពេលវេលា ដើម្បីនាំគ្រួសារទៅពិនិត្យព្យាបាលជំងឺសឹងមិនបាន មានហេតុផលអីបានជាផ្សាយព័ត៌មានបែបនេះ  ! ។ 

សូមបញ្ជាក់ថា, មានគេហទំព័រខ្លះ និងបណ្តាញទំនាក់ទំនងសង្គមហ្វេសប៊ុក បានបង្ហោះថា, គាត់បាននាំចូលទូរស័ព្ទម៉ាក iphone12, iPhone13, iphone 14,និងទូរស័ព្ទម៉ាក Vertu តាមច្រកអាកាសយាន្តដ្ឋានអន្តរជាតិភ្នំពេញ ។ ផ្ទុយទៅវិញ លោកចាត់ទុកថា, ការផ្សព្វផ្សាយនេះ ហាក់មានចេតនា ធ្វើអោយប៉ះពាល់ កិត្តិយស និងសេចក្តីថ្លៃថ្នូរ មកលើរូបលោកយ៉ាងធ្ងន់ធ្ងរ ដែលលោកមិនអាចទទួលយកបាន ហើយព័ត៌មានមិនពិតនេះ បែជាចែកចាយចម្លងតគ្នា សុទ្ធតែជាការបំផ្លើស ដោយគ្មានមូលដ្ឋានជាក់លាក់ ក្នុងនោះប៉ះពាល់ដល់ សមត្ថកិច្ច អាជ្ញាធរ មន្ត្រីជំនាញ គយនិងរដ្ឋាករថែមទៀត។ 

ដោយឡែក លោក លឹម សម្បត្តិ ប្រធានការិយាល័យគយ និងរដ្ឋាករ អាកាសយានដ្ឋានអន្តរជាតិភ្នំពេញ បានប្រាប់ឱ្យដឹងតាមរយៈទូរស័ព្ទថា៖ សម័យនេះទៅហើយ អ្នកណាដល់ថ្នាក់ថ្លើមធំ អនុញ្ញាតអោយមានអំពើរត់ពន្ធទូរស័ព្ទ ឬទំនិញតាមច្រកអាកាសយានដ្ឋានអន្តរជាតិភ្នំពេញ ! បើបញ្ហាទូរស័ព្ទដៃវិញ សូម្បីតែក្រុមហ៊ុនយន្តហោះ គេមានគោលការណ៍គេច្បាស់លាស់ណាស់ គឺមិនមានការដឹកជញ្ជូនទូរស័ព្ទ ដែលមានថ្ម(ឆ្នាំងសាក) ឬទូរស័ព្ទទំនើបដែលប្រើប្រាស់រួចខ្លះ នាំចូលបានទេ ខណៈគេគិតពីបញ្ហាថ្មសាក មានហានិភ័យខ្ពស់ចំពោះយន្តហោះ ដូច្នេះក្រុមហ៊ុនយន្តហោះ មានគោលការណ៍ហាមឃាត់ តឹងតែងបំផុត ។ លោកបន្តថា, គ្មានការនាំចូលទូរស័ព្ទដូចការផ្សព្វផ្សាយនោះទេ បើមាន គឺមានមែន ទូរស័ព្ទដែលភ្ញៀវជាតិ អន្តរជាតិ កាន់មកតាមខ្លួន បន្ទាប់ពីមានការត្រួតពិនិត្យដោយស្ថាប័ន សមត្ថកិច្ច នៅអាកាសយានដ្ឋានពីប្រទេសនីមួយៗ ហើយពីអាកាសយានដ្ឋានអន្តរជាតិភ្នំពេញ របស់កម្ពុជាយើង ក៏ចាំបាច់ត្រួតពិនិត្យបញ្ហារឿងទូរស័ព្ទ ឆ្នាំងសាក នាំតាមខ្លួន ពេលរៀបចេញដំណើរទៅក្រៅប្រទេសផងដែរ។ 

លោក លឹម សម្បត្តិ ប្រធានការិយាល័យគយនិងរដ្ឋាករ អាកាសយានដ្ឋានអន្តរជាតិភ្នំពេញ បានបន្តថា, បើឈ្មោះ អ៊ុង សុភា , ឈ្មោះ ឃីន និងឈ្មោះមេគយណាដែលគេ បង្ហោះថា, រត់ពន្ធទូរស័ព្ទតាមច្រកលោកគ្រប់គ្រង មិនត្រឹមតែមិនមានប៉ុណ្ណោះទេ សូម្បីតែឈ្មោះក៏លោក មិនដែលស្គាល់ផង ។ 

លោកឧត្តមសេនីយ៍ អ៊ុង សុភា បានបញ្ជាក់ថា, ការផ្សព្វផ្សាយតាមគេហទំព័រ តាមបណ្តាញទំនាក់ទំនងសង្គមហ្វេសប៊ុក ប៉ះពាល់រូបលោក នឹងឈ្មោះខាងលើ គឺជាព័ត៌មានមិនពិត លោកក៏បដិសេធ និងច្រានចោលទាំងស្រុង សូមអោយសាធារណជន អ្នកនិយមលេងតាម បណ្តាញទំនាក់ទំនងសង្គមហ្វេសប៊ុក អ្នកផ្សព្វផ្សាយតាមគេហទំព័រ តាមប្រព័ន្ធ អនឡាញ មេត្តាជ្រាបជាព័ត៌មាន ខណៈមនុស្សម្នាក់ៗ តែងស្រឡាញ់ កិត្តិយស និងសេចក្តីថ្លៃថ្នូរ ដូចៗគ្នា៕SRN