ឯកឧត្តមបណ្ឌិត ហ៊ុន ម៉ាណែត ប្រកាសស្វាគមន៍ ស្តេចប្រដាល់ឡេតវេយ៍ភូមា ដាវ លីឌុច តបតាមការស្នើសុំ

ភ្នំពេញ៖ នាយករដ្ឋមន្ត្រីកម្ពុជា នីតិកាលទី៧នៃរដ្ឋសភា ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត នៅព្រឹកថ្ងៃអង្គារទី១៥ ខែសីហានេះ បានឆ្លើយតបទៅកាន់ស្តេចប្រដាល់ឡាតវេយ៍ភូមា ដាវ លីឌុច ចំពោះសំណើសុំមកប្រកួតនៅលើទឹកដីកម្ពុជា នៅចុងឆ្នាំនេះ ដើម្បីជួបជាមួយកីឡាករ ព្រំ សំណាង មុនរូបគេប្រកាសចូលនិវត្តន៍ពីសង្វៀនប្រដាល់។

ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត បានឆ្លើយតបនៅលើគណនីហ្វេសប៊ុកផ្លូវការរបស់ឯកឧត្តមយ៉ាងដូច្នេះថា៖«សួស្ដីលោក Dave Leduc! សូមអរគុណលោកចំពោះទឹកចិត្តស្រឡាញ់ប្រទេសកម្ពុជា និងក្បាច់គុនបុរាណខ្មែរ (គុនខ្មែរ)។ សូមជូនពរលោកទទួលបានជោគជ័យ។ រង់ចាំជួបគ្នានាចុងឆ្នាំនេះ ពេលដែលលោកមកកាន់ប្រទេសកម្ពុជា»។ សារនេះបានបញ្ជាក់យ៉ាងច្បាស់លាស់អំពីជំនួបដ៏កក្រើករវាងកីឡាករ ដាវ លីឌុច និងកីឡាករ ព្រំ សំណាង ដ្បិតថា ស្តេចប្រដាល់ឡេតវេយ៍របស់ប្រទេសភូមា សញ្ជាតិកាណាដារូបនេះ ចិញ្ចឹមចិត្តចង់សាកក្បាច់គុនខ្មែរជាមួយកីឡាករលំដាប់ជួរមុខកម្ពុជា ព្រំ សំណាង អស់ជាច្រើនខែមកហើយ ខណៈអ្នកទាំងពីរក៏បានបង្ហោះសារឌឺដងដាក់គ្នាមិនតិចដែរទេនាពេលកន្លងមក ហើយការប្រកួតនេះ អាចថាជាជំនួបដ៏កក្រើកប្រចាំតំបន់អាស៊ាន និងពិភពលោកផងដែរ។

សូមបញ្ជាក់ថា កាលពីថ្ងៃចន្ទទី១៤សីហា ម្សិលមិញ កីឡាករ ដាវ លីឌុច បានបង្ហោះសារនៅលើគណនីហ្វេសប៊ុករបស់ខ្លួន គោរពជូន ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត ជុំវិញការទទួលបានតំណែងជានាយករដ្ឋមន្ត្រីផង និងការស្នើសុំជួបប្រកួតជាមួយកីឡាករគុនខ្មែរ ដើម្បីរិតចំណងមិត្តភាពកម្ពុជា-ភូមា ក្នុងនាមជាប្រទេសបងប្អូនដែលមានវប្បធម៌ចំណាស់មួយក្នុងតំបន់។ កីឡាករ ដាវ លីឌុច បានបញ្ជាក់យ៉ាងដូច្នេះថា៖ «ខ្ញុំ​សូម​អបអរសាទរ​ឯកឧត្ដមបណ្ឌិត ហ៊ុន ម៉ាណែត សម្រាប់​តំណែង​ជា​នាយករដ្ឋមន្ត្រី​ថ្មី​នៃ​ប្រទេស​កម្ពុជា​។ នៅចុង​ឆ្នាំ​នេះ ខ្ញុំ​មកលេងប្រទេសកម្ពុជា​​ដ៏​ស្រស់​ស្អាត​ ​ហើយត្រូវ​ទៅ​ប្រកួត​ក្រោម​គុន​ខ្មែរ។ នេះនឹងក្លាយជាព្រឹត្តិការណ៍ប្រយុទ្ធដ៏ធំបំផុតក្នុងប្រវត្តិសាស្ត្រកម្ពុជា និងអាស៊ីអាគ្នេយ៍ នៅពេលដែលខ្ញុំមកដល់កម្ពុជា។ ខ្ញុំមានអ្នកតាមដានរាប់លាននាក់នៅក្នុងប្រទេសមីយ៉ាន់ម៉ា ដែលមានប្រជាជនចំនួន៥៤លាននាក់ ប្រទេសកម្ពុជាមាន១៦លាននាក់ ហើយប្រទេសទាំងពីរនឹងលើកទឹកចិត្តពួកយើង ដើម្បីអបអរសាទរមិត្តភាពដ៏អស្ចារ្យរវាងមីយ៉ាន់ម៉ា និងកម្ពុជា តាំងពីបុរាណកាលមក»។

បន្ថែមលើនេះ កីឡាករ ដាវ លីឌុច មានជំនឿចិត្តថា ការប្រកួតរបស់គេនៅប្រទេសកម្ពុជា ជាមួយកីឡាករប្រដាល់ជួរមុខរបស់កម្ពុជា គឺកីឡាករ ព្រំ សំណាង នឹងក្លាយជាព្រឹត្តិការណ៍ប្រវត្តិសាស្ត្រថ្មីមួយសម្រាប់វិស័យប្រដាល់គុនខ្មែរ ហើយអាចនឹងមានអ្នកទស្សនារាប់លាន់នាក់ជុំវិញពិភពលោក។ ស្តេចប្រដាល់គុនឡេតវេយ៍ភូមា បញ្ជាក់យ៉ាងដូច្នេះថា៖«ប្រព័ន្ធផ្សព្វផ្សាយទូទាំងពិភពលោក នឹងនិយាយអំពីព្រឹត្តិការណ៍នេះ ព្រោះវានឹងក្លាយជាការប្រយុទ្ធចូលនិវត្តន៍បស់ខ្ញុំ។ តើឯកឧត្ដមចូលចិត្តសិល្បៈក្បាច់គុនឬទេ? ប្រសិនបើចូលចិត្ត នោះពិតជាមហាកិត្តិយសសម្រាប់ខ្ញុំ សម្រាប់គូប្រជែងរបស់ខ្ញុំ និងប្រជាជនកម្ពុជាទាំងអស់ ប្រសិនបើឯកឧត្ដម មានវត្តមានអញ្ជើញចូលរួមជាភ្ញៀវមហាកិត្តិយសនៅទីក្រុងភ្នំពេញ។ ទោះ​បីជាខ្ញុំជាជនជាតិ​បរទេស​ក៏ដោយ ក៏​ខ្ញុំ​ស្រឡាញ់​ និង​គោរព​កម្ពុជាផង​ដែរ ហេតុ​នេះ​ហើយ​បាន​ជា​ខ្ញុំ​ព្រម​ប្រកួត​ក្រោម​គុន​ខ្មែរ​បុរាណ ព្រោះ​ខ្ញុំ​ដឹង​ពីប្រវត្តិ​សាស្ត្រពិត…ខ្ញុំ​ចង់​ចាប់​ដៃ​​ឯកឧត្ដមបណ្ឌិត ហ៊ុន ម៉ាណែត។ សង្ឃឹមថា ឯកឧត្ដម អាចពិចារណាតាមការអញ្ជើញរបស់ខ្ញុំ! សូមទទួលនូវការគោរពដ៏ខ្ពង់ខ្ពស់ពីខ្ញុំ»។

គួរបញ្ជាក់ថា សម្រាប់ការបញ្ជាក់ដ៏ច្បាស់លាស់របស់ប្រមុខរាជរដ្ឋាភិបាលកម្ពុជា នាពេលអនាគតដ៏ខ្លីខាងមុខនេះ កម្ពុជានឹងមានព្រឹត្តិការណ៍ប្រដាល់គុនខ្មែរកម្រិតពិភពលោកមួយនៅចុងឆ្នាំនេះ ខណៈ ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា អាចនឹងចូលរួមជាសក្ខីភាពក្នុងពិធីនោះផងដែរ។ ដូច្នេះ វាច្បាស់ណាស់ថា ស្តេចប្រដាល់គុនឡេតវេយ៍ភូមា កីឡាករ ដាវ លីឌុច នឹងបង្ហាញវត្តមាននៅប្រទេសកម្ពុជា ប្រកួតប្រដាល់គុនខ្មែរ ហើយព្រឹត្តិការណ៍ប្រដាល់ដ៏ធំមួយនេះ នឹងរុញច្រានគុនខ្មែរឆ្ពោះទៅកាន់ឆាកអន្តរជាតិកាន់តែលឿនមិនខានឡើយ…៕