អំពើពុករលួយរបស់ប្រធានមន្ទីរកសិកម្មខេត្តកោះកុងធំធេងណាស់តើត្រូវបញ្ចប់ត្រឹមដកតំណែងនេះឬ?

September 6, 2023 ព័ត៌មានជាតិ

ខេត្តកោះកុង៖ ក្រោយពីផ្ទុះបែកធ្លាយរឿងអាស្រូវពុករលួយមន្ត្រីជំនាញជលផលនៃមន្ទីរកសិកម្មរុក្ខាប្រមាញ់និងនេសាទខេត្ត កោះកុង ពាក់ព័ន្ធនឹងអំពើស៊ីសំណូកសូកប៉ាន់ពីបទ ល្មើសនេសាទខុសច្បាប់នោះរួចមក លោក ព្រំ សុវណ្ណា នាយផ្នែកជលផលបូទុមសាគរ ត្រូវបានមន្ទីរកសិកម្មរុក្ខាប្រមាញ់និងនេសាទ ខេត្តកោះកុងដកឲ្យមកបំពេញ ការងារនៅខណ្ឌរដ្ឋបាលជលផលកោះកុងជាបណ្ដោះ អាសន្ន។ ចំណែកលោក អ៉ី ម៉េងលាង ប្រធានមន្ទីរកសិកម្មរុក្ខាប្រមាញ់និងនេសាទខេត្តកោះកុង ក៏ត្រូវបានផ្អាកតួនាទីនិងភារកិច្ចជាបណ្ដោះអាសន្ន ។

ប្រភពបានឲ្យដឹងថា លោក ឌិត ឌីណា រដ្ឋមន្រ្ដីក្រសួងកសិកម្ម រុក្ខាប្រម៉ាញ់ និងនេសាទ បានចាត់តាំងមន្រ្ដីជំនាញជាន់ខ្ពស់ជាច្រើនរូបដឹកនាំដោយលោក គង់ វ៉ាញ អគ្គាធិការ នៃអគ្គាធិការដ្ឋាន ចុះមកធ្វើអធិការកិច្ច បើកការស៊ើបអង្កេតទៅលើ លោកអ៉ី ម៉េងលាង ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកោះកុង និង លោក ព្រំ សុវណ្ណា នាយផ្នែកជលផលបូទុមសាគរជុំវិញ ករណីឃុបឃិតទទួលសំណូក កិបកេងចំណូលថវិកា ជាតិជាច្រើនលានរៀល ពីឈ្មួញរកស៊ីខ្យងសនិងការប្រើ ប្រាស់ឧបករណ៍នេសាទល្មើសច្បាប់តាមឆកសមុទ្រថ្មស ក្នុងស្រុកស្រែអំបិលនិងស្រុកបូទុមសាគរខេត្តកោះកុង។ក្រោយការស៊ើបអង្កេតគឺនៅថ្ងៃទី០១ ខែកញ្ញាមនេះដែរ លោករដ្ឋមន្ត្រីបានសម្រេចដកលោកអ៊ី ម៉េងលាង ចេញ ពីប្រធានមន្ទីរកសិកម្មខេត្តកោះកុង ស្របពេលដែលលោកប្រធានមន្ទីរសម្រេចដកលោកព្រំ សុវណ្ណា ឱ្យមកនៅខណ្ឌរដ្ឋបាលជលផល។

លោក អ៉ី ម៉េងលាង ប្រធានមន្ទីរកសិកម្មរុក្ខាប្រមាញ់និងនេសាទខេត្តកោះកុងនិង លោក ព្រំ សុវណ្ណា នាយផ្នែកជលផលបូទុមសាគរ បែកធ្លាយក្រដាសវេរលុយតាមធនាគារវីង និងតាមធនាគារអេស៊ីលីដា ជាច្រើនសន្លឹក ដែលឈ្មួញនេសាទប្រើប្រាស់ឧបករណ៍ល្មើសច្បាប់ និងដឹកជញ្ជូនខ្យង.សទៅលក់នៅប្រទេសវៀតណាម គ្មានលិខិតអនុញ្ញាតិពីក្រសួងកសិកម្ម ជាច្រើនលានរៀលជាថ្នូរបិទភ្នែក ខ្ទប់ត្រចៀក ធ្វើមិនដឹងមិនលឺ ដោយគ្មានវិធានការបង្ក្រាប ធ្វើឲ្យហិនហោចដល់ធនធានធម្មជាតិមច្ឆសមុទ្រ ពិសេសនៅបូទុមសាគរ។

ចំពោការបែកធ្លាយវេរលុយតាមធនាគារវីង និងតាមអេស៊ីលីដា ដែលឈ្មួញនេសាទប្រើប្រាស់ឧបករណ៍ល្មើស ច្បាប់ និងដឹកជញ្ជូនខ្យង.ស ទៅលក់នៅប្រទេសវៀត ណាម គ្មានលិខិតអនុញ្ញាតិពីក្រសួងកសិកម្ម ជាច្រើនសន្លឹកវេរទៅឲ្យមន្ត្រីជលផលបូទុមសាគរ និងប្រធាន មន្ទីរកសិកម្មរុក្ខាប្រមាញ់នោះ មានចំនួន២៦សន្លឹកដែលមានលុយចាប់ពី៥០ម៉ឺនរៀល,៧០ ម៉ឺន, ១លាន,២លាន រហូតដល់៤លានរៀល នេះមិនរាប់បញ្ចូលការពិន័យអន្ដរកាលលើការចាប់រថយន្ដដឹកជញ្ជន ខ្យងស និងការចាប់ទូកនេសាទអូសខ្យង.សនោះទេ ។

ថ្មីៗនេះដែរបែកធ្លាយសម្លេងអ្នករកស៊ីខ្យង.ស ឈ្មោះដាំ និងសម្លេងមន្ត្រីជលផលបូទុមសាគរទារលុយសំណូកពុករលួយ ពីមេឈ្មួញប្រើប្រាស់ឧបករណ៍នេសាទល្មើស ច្បាប់អូសខ្យង.សយកទៅលក់នៅប្រទេសវៀតណាម ឈ្មោះ ជីវ័ន្ដ ថែមទៀតផង។

បញ្ហានៅត្រង់ថាតើអំពើពុករលួយដែលរកឃើញនេះត្រូវបញ្ចប់ត្រឹមការដកដំណែងលោកប្រធានមន្ទីរនិងលោក នាយផ្នែកនោះឬយ៉ាងណា? ឬមួយត្រូវយកគាត់ទាំងពីរនាក់ឲ្យមកឡើងធំនៅក្រសួងកសិកម្ម? ប្រសិនបើគ្មានវិធានការច្បាប់ផ្ដន្ទាទោសឲ្យធ្ងន់ធ្ងរគេពួកមន្ត្រីក្រោយៗទៀតនឹងបន្តប្រព្រឹត្តអំពើពុករលួយថែមទៀតជាមិនខាន៕SRN