SRNTV TV ONLINE CAMBODIA
កំពង់ចាម: ឯកឧត្តម ឈុំ ឆុនលី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអះអាងថា ដំណាំកសិកម្មដែលមានសារសំខាន់ទី២ បន្ទាប់ពីដំណាំស្រូវនោះ គឺដំណាំពោតក្រហមសម្រាប់កម្ពុជា ដែលដំណាំពោតក្រហមមួយនេះ កសិករនិយមដាំដុះលេីផ្ទៃដីជាង២០ម៉ឺនហិកតា នៅទូទាំងប្រទេសកម្ពុជា ក្នុងឆ្នាំ២០២២កន្លងទៅនេះ ទិន្នផលវិញបានជាង ១លានតោន។ ការថ្លែងបែបនេះក្នុងអង្គសិក្ខាសាលាស្តីពីស្ថានភាពបច្ចប្បន្ន និងទស្សនវិស័យអនាគតនៃការអភិវឌ្ឍន៍ពូជពោតអ៊ីប្រ៊ីតនៅកម្ពុជា ដេីម្បីដឹងពីបញ្ហាប្រឈមនៃផលិតកម្មដំណាំពោតក្រហមនៅកម្ពុជា។
ឆ្លៀតក្នុងឱកាសនោះដែរ ឯកឧត្តម ឈុំ ឆុនលី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងថា អគ្គនាយកដ្ឋានកសិកម្ម បានទទួលការគាំទ្រថវិការពីមជ្ឈមណ្ឌល KOPIA កូរ៉េប្រចាំកម្ពុជា ក្នុងការអនុវត្តគម្រោងនេះរយៈពេល ៣ឆ្នាំ ក្នុងការចុះបេសកម្ម នៅខេត្តចំនួន៥ រួមមាន៖ ខេត្តកណ្ដាល កំពង់ចាម ត្បូងឃ្មុំ បាត់ដំបង និងខេត្តប៉ៃលិន។
ជាមួយគ្នានោះ លោក សុង យ៉ុងហ្សូ នាយកមជ្ឈមណ្ឌល KOPIA កូរ៉េប្រចាំនៅកម្ពុជា បានលេីកឡេីងដែរថា សិក្ខាសាលានៅពេលនេះ គឺចង់ឲ្យកសិករ និងអ្នកក្រុមហ៊ុនអាចទទួលបាននូវបច្ចេកទេសថ្មីៗបន្ថែមទៀត ទាំងលេីបច្ចេកទេសដាំដុះ និងស្រាវជ្រាវបន្ថែម ដើម្បីអភិវឌ្ឍន៍ពូជពោតអ៊ីប្រ៊ីដកម្ពុជា០១ ឲ្យកាន់តែប្រសើរ។ លោកសុង យ៉ុងហ្សូ ក៏ចង់ឲ្យក្រសួងកសិកម្ម រៀបចំផែនការយុត្តិសាស្ត្ររយៈពេលវែង ក្នុងការអនុវត្ត៍សម្រាប់ពូជពោតអ៊ីប្រ៊ីដកម្ពុជា០១ ដេីម្បីឲ្យខាងកូរ៉េ ក៏ដូចជាប្រទេសដទៃផ្តល់ជំនួយបន្ថែមទៀតលេីការស្រាវជ្រាវ និងការអនុវត្តន៍ពូជពោតមួយនេះ។
គួរបញ្ជាក់ថា ក្នុងរយៈពេល២ថ្ងៃ គឺចាប់ពីថ្ងៃទី១៩ និងថ្ងៃទី២០ ខែតុលានេះ នៅខេត្តកំពង់ចាម បានបេីកអង្គសិក្ខាសាលាមួយស្តីពី ស្ថានភាពបច្ចប្បន្ន និងទស្សនវិស័យអនាគតនៃការអភិវឌ្ឍន៍ពូជពោតអ៊ីប្រ៊ីតនៅកម្ពុជា ដោយមានការអញ្ជេីញចូលរួមពី ឯកឧត្តម ឈុំ ឆុនលី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកបណ្ឌិត យិន ចន្ទ័សុធីតំណាងឯកឧត្ដមប្រតិភូអគ្គនាយកនៃអគ្គនាយកដ្ឋានកសិកម្ម និង លោក សុង យ៉ុងហ្សូ នាយកមជ្ឈមណ្ឌល KOPIA កូរ៉េប្រចាំនៅកម្ពុជា ព្រមទាំងសិក្ខាកាមជាម្ចាស់ក្រុមហ៊ុន និងកសិករមកពីខេត្តត្បូងឃ្មុំ និងខេត្តកំពង់ចាម ៕
