រដ្ឋមន្ត្រីបរិស្ថាន​ ព្រមានអ្នកកាប់ព្រៃឈើ​ បើនៅតែបន្តសកម្មភាព​ នឹងមិនរួចខ្លួនទេ

ក្រចេះ៖​ រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានព្រមានជាថ្មីថា អ្នកប្រព្រឹត្តបទល្មើសធនធានធម្មជាតិ គ្មានការលើកលែងនោះទេ ដោយពួកគេនឹងប្រឈមមុខចំពោះច្បាប់ជាធរមាន។ គ្រប់ករណីប្រព្រឹត្តិបទល្មើសទាំងឡាយ ឱ្យតែចាប់បាន ត្រូវតែកសាងសំណុំរឿងដាក់ទៅតុលា ដើម្បីចាត់វិធានការតាមច្បាប់កំណត់។​ ការលេីកឡេីងដូចនេះ​ ក្នុងកម្មវិធីលើកទឹកចិត្តប្រតិបត្តិករមេត្រីបរិស្ថាន និងការប្រគល់រង្វាន់ជ័យលាភីចលនាប្រលងប្រណាំង«ភូមិ-ឃុំ-សង្កាត់មានសុវត្ថិភាព» ក្នុងក្របខ័ណ្ឌលក្ខណៈសម្បត្តិទី៦ ឆ្នាំ២០២៣ កាលពីថ្ងៃទី២៦ ខែតុលា​ ឆ្នាំ២០២៣។

លោក អ៊ាង សុផល្លែត​ បានលេីកឡេីងយ៉ាងដូច្នេះថា​ «អ្នកឯងអាចគេចផុតថ្ងៃហ្នឹង ប៉ុន្តែថ្ងៃស្អែកអ្នកឯងនឹងមិនអាចគេចផុតនោះទេ! អ្នកឯងដេកក៏មិនស្រួលដែរ ព្រោះខ្ញុំតាមអ្នកឯងរហូត! អ្នកឯងអាចភ្លេច ប៉ុន្តែខ្ញុំអត់ភ្លេចនោះទេ!»។

លោក​ អ៊ាង សុផល្លែត ក៏បានរំឭកនូវការដាក់ចេញវិធានការចម្បងចំនួន៤ ដើម្បីគ្រប់គ្រងធនធានធម្មជាតិ និងអភិរក្សជីវៈចម្រុះ ឱ្យមានប្រសិទ្ធភាព និងដើម្បីការអភិវឌ្ឍដោយចីរភាព។ វិធានការទាំង៤នោះ​ រួមមាន៖
​ ទី១. ការអនុវត្តច្បាប់​ ១០០ភាគរយ និងបញ្ចប់នូវវប្បធម៌អប់រំណែនាំ និងចុះកិច្ចសន្យា ហើយដោះលែងចំពោះអ្នកប្រព្រឹត្តបទល្មើសធនធានធម្មជាតិ,
ទី២. កិច្ចសហការជាមួយគណៈបញ្ជាការឯកភាពរដ្ឋបាលរាជធានី-ខេត្ត ជាពិសេសជាមួយអាជ្ញាធរដែនដី ឱ្យបានស្អិតល្មួត ដើម្បីទប់ស្កាត់បទល្មើសធនធានធម្មជាតិ នៅតាមតំបន់ការពារធម្មជាតិ,
ទី៣. កិច្ចសហការជាមួយអង្គភាពប្រឆាំងនឹងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស ធ្វើការបង្រ្កាប​ និងទប់ស្កាត់បទល្មើសធនធានធម្មជាតិ បន្ថែមលើកិច្ចសហការជាមួយអាជ្ញាធរមូលដ្ឋាន ដែលបានអនុវត្តកន្លងមក,
៤. ការដាំដើមឈើឱ្យច្រើនជាងការកាប់ដើម្បីរក្សានូវកំណើន ជាពិសេសការជំរុញការដាំស្ដារព្រៃឈើ ជាទិសដៅអាទិភាពបង្កើនគម្របព្រៃឈើឲ្យបាន៦០ភាគរយ នៅឆ្នាំ២០៥០ ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា និងលើកកម្ពស់ជីវភាពប្រជាពលរដ្ឋនៅតាមសហគមន៍ ការអភិរក្សជីវៈចម្រុះដោយចីរភាព។

លោក ឆាយ ឌួងសាវុធ ប្រធានមន្ទីរបរិស្ថានខេត្តក្រចេះ បានគាំទ្រចំពោះវិធានការដែលបានដាក់ចេញដោយដោយរដ្ឋមន្ត្រីក្រសួងបរិស្ថានទាំង​ ៤ចំណុចនេះ ដោយលោកអះអាងថា នឹងខិតខំពង្រឹងការអនុវត្តច្បាប់ឱ្យបានតឹងរឹង និងមានប្រសិទ្ធភាព ជាមួយសកម្មភាពចុះល្បាតដូចភ្លៀងរលឹមនៅតាមតំបន់ការពារធនធានធម្មជាតិ ដែលស្ថិតក្នុងដែនសមត្ថកិច្ចរបស់ខ្លួន។

ដូចគ្នានេះ លោក ស្រេង ជាហេង ប្រធានមន្ទីរបរិស្ថានខេត្តស្ទឹងត្រែង បានបញ្ជាក់ជំហរអនុវត្តច្បាប់ ដោយមិនមានលើកលែងចំពោះបុគ្គលប្រព្រឹត្តបទល្មើសបំផ្លាញធនធានធម្មជាតិនោះទេ។ ពោលគឺ បញ្ចប់នូវវប្បធម៌ធ្វើកិច្ចសន្យាហើយដោះលែង ហើយងាកមកអនុវត្តច្បាប់ដោយគ្មានការលើកលែងនោះឡើយ។

សូមបញ្ជាក់ថា ដោយអនុវត្តការបទបញ្ជារបស់រដ្ឋមន្ត្រីក្រសួងបរិស្ថាន​ នូវវិធានការទាំង៤ចំណុចខាងលើ ក្រុមអធិការកិច្ចរបស់ក្រសួងបរិស្ថាន ដឹកនាំដោយ លោក ជា សំអាង រដ្ឋលេខាធិការក្រសួងបរិស្ថាន កាលពីថ្ងៃទី២៤-២៥ ខែតុលា បានចុះធ្វើអធិការកិច្ចដោយផ្ទាល់នៅលើទីតាំងសង្ស័យករណីបទល្មើសធនធានធម្មជាតិកើតមាននៅក្នុងភូមិសាស្ត្រដែនជម្រកសត្វព្រៃ «ព្រៃឡង់»​ ខេត្តក្រចេះ។

ការចុះធ្វើអធិការកិច្ច ដែលមានការចូលរួមពីអង្គការដៃគូផងនោះ ធ្វើឡើងបន្ទាប់ពីមានផ្សព្វផ្សាយតាមបណ្តាញព័ត៌មានថា មានការលួចធ្វើផ្លូវថ្មី ដើម្បីដឹកឈើចេញពីតំបន់ការពារធនធានធម្មជាតិមួយនេះ។ តាមរយៈការចុះពិនិត្យដោយផ្ទាល់នេះ បានបញ្ជាក់ថា មិនមានការលួចធ្វើផ្លូវថ្មីនោះទេ តែរូបភាពដែលបានផ្សព្វផ្សាយនោះ ជារូបភាពផ្លូវចាស់ និងជាផ្លូវអភិវឌ្ឍន៍របស់ក្រុមហ៊ុនចំការឈើដាំរបស់ក្រុមហ៊ុន ស៊ីង បាយ អូថេក (Think Bio-Tech) និងក្រុមហ៊ុនដាំដំណាំកសិកម្មមួយចំនួនទៀត ដែលទទួលបានសិទ្ធិសម្បទានរបស់រាជរដ្ឋាភិបាលកម្ពុជាប៉ុណ្ណោះ៕