SRNTV TV ONLINE CAMBODIA
ភ្នំពេញ៖ ប្រភពពីលោកអអិការរងនគរបាលខណ្ឌសែនសុខបានឱ្យអង្គភាពយើងដឹងនៅព្រឹកថ្ងៃទី២៥ខែឧសភាឆ្នាំ២០២៣នេះថា ខាងជំនាញកំពុងកសាងសំណុំរឿងបញ្ជូនខ្លួនថៅកែដីឡូត៍ដ៏ល្បីឈ្មោះលោក គឹម ចាន់រតនា ទៅតុលាការនៅរសៀលនេះពាក់ព័ន្ធនឹងបទកំហែងយក និងបទគំរាមកំហែងហែកកេរ្តិ៍។
សូមរំលឹកផងដែរថា កាលពីល្ងាចថ្ងៃទី ២៤ ខែឧសភា ឆ្នាំ២០២៣នេះសមត្ថកិច្ចខណ្ឌសែនសុខបានឃាត់ខ្លួនជនសង្ស័យម្នាក់តាមដីការបស់សាលាដំបូងរាជធានីភ្នំពេញ ពីបទកំហែងយក និងបទ គំរាមកំហែងហែកកេរ្តិ៍។
បេីយោងតាមដីកាបង្គាប់ឱ្យនាំខ្លួន របស់សាលាដំបូងរាជធានីភ្នំពេញដែលបានចេញកាលពីថ្ងៃទី១៥ ខែឧសភា ឆ្នាំ២០២៣ បានឱ្យដឹងថា បានឃើញ មាត្រា១៨៨ និងមាត្រាបន្តបន្ទាប់ នៃក្រមនីតិវិធីព្រហ្មទណ្ឌ ។ បានឃើញ សំណុំរឿងព្រហ្មទណ្ឌលេខ ៩១៥ ចុះថ្ងៃទី១៥ ខែកុម្ភៈ ឆ្នាំ២០២៣ និងបានឃើញដីកាសន្និដ្ឋានបញ្ជូនរឿងឱ្យស៊ើបសួរលេខៈ ១៣៧៥ អ.យ. ចុះថ្ងៃទី២៩ ខែមីនា ឆ្នាំ២០២៣ ដែលចោទប្រកាន់លើឈ្មោះ គឹម ចាន់រតនា ភេទប្រុស អាយុ៣១ឆ្នាំ (កើតថ្ងៃទី២៨ ខែមេសា ឆ្នាំ១៩៩២) ជនជាតិខ្មែរ មុខរបរអាជីវករ ទីលំនៅបច្ចុប្បន្នស្ថិតនៅផ្លូវលំ ភូមិព្រះធាតុ សង្កាត់រលួស ខណ្ឌដង្កោ រាជធានីភ្នំពេញ ពីបទៈ កំហែងយក និងគំរាមកំហែងហែកកេរ្តិ៍ ប្រព្រឹត្តនៅរាជធានីភ្នំពេញ កាលពីអំឡុងខែកុម្ភៈ ឆ្នាំ២០២៣ បទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា ៣៦៣ មាត្រា ៣៦៤ មាត្រា ៣៧២ និងមាត្រា ៣៧៣ នៃក្រមព្រហ្មទណ្ឌ។
តាមដីកាដដែលបានបន្ថែមថា បានឃើញ ដីកាបង្គាប់ឱ្យចូលខ្លួនលេខៈ ៦០៨ “ឃ១” ព្រ.ទ ចុះថ្ងៃទី២៤ ខែមេសា ឆ្នាំ២០២៣ របស់សាលាដំបូងរាជធានីភ្នំពេញ និងតាមដីកាបង្គាប់ឱ្យចូលខ្លួនលេខៈ ៦០៨ “ឃ១” ព្រ.ទ ចុះថ្ងៃទី២៤ ខែមេសា ឆ្នាំ២០២៣ របស់សាលាដំបូង រាជធានីភ្នំពេញ ជនត្រូវចោទពុំបានមកបង្ហាញខ្លួននៅចំពោះមុខតុលាការទាល់តែសោះ ហេតុដូច្នេះតុលាការគប្បីនាំខ្លួនជនត្រូវចោទឈ្មោះ គឹម ចាន់រតនា មកបង្ហាញខ្លួននៅចំពោះមុខតុលាការ ។ -ដើម្បីធានាដល់ការស៊ើបសួរឱ្យបានពេញលេញគប្បីសម្រេចនាំខ្លួនឈ្មោះ គឹម ចាន់រតនា មកចំពោះមុខចៅក្រមស៊ើបសួរដើម្បីបំភ្លឺការណ៍ពិត ។
ដីកាដដែលបានឱ្យដឹងទៀតថា ហេតុដូច្នេះសម្រេច៖
១-ឱ្យនាំខ្លួនឈ្មោះ គឹម ចាន់រតនា ដែលមានអត្តសញ្ញាណដូចខាងលើនេះ ។
២-បង្គាប់មកកងកម្លាំងសាធារណៈឱ្យចាប់ និងនាំខ្លួនឈ្មោះខាងលើនេះមកប្រគល់ជូនសាលាដំបូងរាជធានីភ្នំពេញ មុនថ្ងៃទី១៥ ខែមិថុនា ឆ្នាំ២០២៣ ដើម្បីចាត់ការតាមច្បាប់ ។
សូមបញ្ជាក់ថា បច្ចុប្បន្នថៅកែដីឡូត៍ដ៏ល្បីឈ្មោះលោក គឹម ចាន់រតនា សមត្ថកិច្ចខណ្ឌសែនសុខកំពុងសាកសួរ ដេីម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធីច្បាប់៕
