សម្តេចតេជោ ហ៊ុន សែន៖ ថ្ងៃនេះខួប៧២ឆ្នាំ ថ្ងៃកំណើតគណបក្សប្រជាជនកម្ពុជា ខណៈការៀបចំផ្លូវការធ្វើឡើងនៅថ្ងៃទី១កក្កដា ដែលចំថ្ងៃបើកនៃយុទ្ធនាការឃោសនាបោះឆ្នោត

​ភ្នំពេញ៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានថ្លែងថា សូមអបអរសាទរ​ នៅព្រឹកថ្ងៃទី២៨ ខែមិថុនា ឆ្នាំ២០២៣ នេះ គឺជាខួប៧២ឆ្នាំ នៃថ្ងៃកំណើតគណបក្សប្រជាជនកម្ពុជា។

ការថ្លែងនេះរបស់សម្តេច​នាយករដ្ឋមន្ត្រី ​ហ៊ុន សែន ​ក្នុងឱកាសអញ្ជើញចុះជួបសំណេះសំណាល ជាមួយកម្មករ និយោជិត សរុប ១៨.៣១៣ នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ។

«នៅថ្ងៃទី២៨ ខែមិថុនា ឆ្នាំ២០២៣ នេះ គឺជាខួប៧២ឆ្នាំ ថ្ងៃកំណើតគណបក្សប្រជាជនកម្ពុជា ។ នៅឆ្នាំនេះ គណបក្សប្រជាជន កម្ពុជា មិនបានរៀបចំពិធីរំឭកថ្ងៃបង្កើតគណបក្សខួបលើកទី៧២ នៅចំថ្ងៃទី២៨ មិថុនា នោះទេ ដោយនឹងត្រូវរៀបចំនៅថ្ងៃទី១ ខែកក្កដា ដែលចំថ្ងៃបើកនៃយុទ្ធនាការឃោសនា បោះឆ្នោតវិញ»។ នេះជាប្រសាសន៍របស់សម្ដេច ហ៊ុន សែន។

សម្ដេចតេជោ ​បានបញ្ជាក់ថា ទោះជាយ៉ាងណា ក៏យើងមិនឲ្យចន្លោះប្រហោង ហើយនៅក្នុងថ្ងៃនេះ ឃើញមានសាររបស់សមាជិក សមាជិកា គណបក្សប្រជាជន បានបង្ហោះព្រោងព្រាត ស្ដីអំពីខួបអនុស្សាវរីយ៍លើកទី៧២ ឆ្នាំ បង្កើតគណបក្សប្រជាជនកម្ពុជា។

សម្តេចនាយករដ្ឋមន្ដ្រី បានលើកឡើងថា ​​អាយុសម្តេច តិចជាងថ្ងៃកំណើតបក្សតែមួយឆ្នាំប៉ុណ្ណោះ។ ដូច្នេះរឿងរ៉ាវប្រវត្តិសាស្ត្រខ្លះ សម្តេចក៏មិនបានដឹងនោះដែរ៕