ឆ្លងចរន្តអគ្គីសនី​បណ្តាលឲ្យ ឆាបឆេះផ្ទះ ល្វែងមួយកន្លែងនៅខណ្ឌឬស្សីកែវបង្កឲ្យមានការភ្ញាក់ផ្អើលទាំងព្រឹក

(ភ្នំពេញ)៖ អគ្គិភ័យបានលេបត្របាក់ផ្ទះប្រជាពលរដ្ឋ​ មួយកន្លែង បណ្តាលឲ្យឆេះខូចខាតបន្ទប់ជាន់ឡៅតឿ​ និងសម្ភារៈប្រេីប្រាស់អស់មួយចំនួន​ ក្នុងនោះមិនបានបណ្តាលឲ្យអ្នកណាម្នាក់រងរបួសនោះឡេីង។ ហេតុការណ៍គ្រោះអគ្គិភ័យខាងលើនេះ បានកើតឡើងនៅវេលាម៉ោង៦និង៣០នាទីព្រឹក ថ្ងៃទី០៤​ ខែសីហា​ ឆ្នាំ២០២៣ ដែលស្ថិតនៅចំណុចផ្ទះលេខ២៤៨​ ផ្លូវបេតុង​ លេខ១០៣ភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។

លោកវរសេនីយ៍ឯក ព្រហ្ម​ យ៉ន​ នាយការិយាល័យនគរបាលបង្ការពន្លត់អគ្គិភ័យ​ និងសង្គ្រោះ​ នៃស្នងការដ្ឋាននគរបាលរាជធានីភ្នំពេញ​ បានប្រាប់ឲ្យដឹងថា​ ដោយនៅក្នុងប្រតិបត្តិការខាងលើនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន០៧គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន០៧គ្រឿង ប្រើប្រាស់ទឹកអស់០៥ឡាន ស្មេីរនឹង​ ២០ម៉ែត្រគូ​ប​ និងរថយន្តជំនួយមកពីសាលាខណ្ឌឬស្សីកែវ​ ចំនួន​ ០១គ្រឿង​ ប្រេីប្រាស់ទឹកអស់០១ឡាន​ ស្មេីរនឹង​ ០៤ម៉ែត្រគូប។ 

សមត្ថកិច្ច បានបញ្ជាក់ថា ចំពោះករណីគ្រោះអគ្គិភ័យខាងលើនេះ ជាប្រភេទសំណង់​ ថ្មបេតុង ទំហំ​ ​(៥ម៉ែត្រ​ គុណ​ ២០ម៉ែត្រ)​ បានឆេះខូចខាតបន្ទប់ជាន់ឡៅតឿចំនួន​០១បន្ទប់​ និងសម្ភារៈប្រេីប្រាស់ប្រចាំថ្ងៃអស់មួយចំ​នួន​ នឹងពុំបណ្តាលឲ្យឆេះរាលដាលដល់ផ្ទះអ្នកក្បែរខាងឡេីយ។ 

ចំពោះករណីអគ្គិភ័យខាងលើនេះ ត្រូវបានកម្លាំងសមត្ថកិច្ចជំនាញរបស់ធ្វើការគ្រប់គ្រងបាននៅវេលាម៉ោង៧និង២០នាទីព្រឹកថ្ងៃខែឆ្នាំដដែល ក្នុងនោះមិនបានបណ្តាលឲ្យអ្នកណាម្នាក់រងរបួសនោះឡេីយ។ រឺឯមូលហេតុដែលបណ្តាលឲ្យកើតមានគ្រោះអគ្គិភ័យខាងលើនេះ គឺបណ្តាលមកពីការឆ្លងចរន្តអគ្គីសនី៕