សម្តេចធិបតី ហ៊ុន ម៉ាណែត ៖ អ្នកមានអំណាចពិតប្រាកដនៅកម្ពុជា គឺជាពលរដ្ឋ

ភ្នំពេញ៖ សម្តេចធិបតី ហ៊ុន ម៉ាណែត បានថ្លែងថា «អ្នកមានអំណាចពិតប្រាកដនៅកម្ពុជា គឺជាពលរដ្ឋ ហើយបក្សពួករបស់យើងគឺពលរដ្ឋប្រមាណ១៧លាននាក់»។ នេះជាការថ្លែងរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ក្នុងឱកាសអញ្ជើញជួបសំណេះសំណាលជាមួយកម្មករនិយោជិតនៅតាមរោងចក្រសហគ្រាសជិត២ម៉ឺននាក់នៅខណ្ឌមានជ័យ រាជធានីភ្នំពេញ នាព្រឹកថ្ងៃទី ២៨ ខែតុលា ឆ្នាំ២០២៣នេះ ។

ការថ្លែងរបស់សម្តេចធិបតីបែបនេះ ដោយសារតែមានអ្នកវិភាគប្រឆាំងនៅក្រៅប្រទេសបាននិយាយថា គោលនយោបាយរបស់ ហ៊ុន ម៉ាណែត សំរាប់តែបក្សពួក និងអ្នកមានអំណាច។
សម្តេចធិបតី បានបញ្ជាក់ថា «អ្នកវិភាគប្រឆាំងនោះ មានទស្សនៈបែបចង្អៀតចង្អល់ ហើយទស្សនៈរបស់ក្រុមអ្នកប្រឆាំង ធ្វើឲ្យពួកគេមិនដែលឈ្នះរហូត»។

សម្តេចធិបតី ហ៊ុន ម៉ាណែត បានឆ្លើយតបថា «បក្ខពួករបស់ខ្ញុំ គឺប្រជាពលរដ្ឋខ្មែរទាំងអស់ប្រមាណ១៧លាននាក់ ហើយអ្នកមានអំណាចនៅកម្ពុជា គឺប្រជាពលរដ្ឋទាំងអស់»។ សម្តេចធិបតីបានបន្តថា «ខ្ញ៉ំដាក់ចេញគោលនយោបាយគឺដើម្បីពលរដ្ឋទាំងអស់»៕