អនុប្រធានប្រចាំការ ស.ស.យ.ក ខេត្តកណ្តាល លើកទឹកចិត្តដល់សមាជិកចូលរួមឱ្យបានសកម្មក្នុងនាមជាអ្នកអង្កេតការណ៍បោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ

ខេត្តកណ្តាល៖នៅព្រឹកថ្ងៃទី២៣ ខែឧសភា ឆ្នាំ២០២៤ លោក ជី ស៊ីវុត្ថា អនុប្រធានប្រចាំការ ស.ស.យ.ក ខេត្តកណ្តាល បានដឹកនាំវគ្គបណ្តុះបណ្តាលស្តីពី ដំណើរការនៃការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌអាណត្តិទី៤ ឆ្នាំ២០២៤ ជូនដល់អ្នកសង្កេតការណ៍បោះឆ្នោត ទាំង១៣ក្រុង-ស្រុក នៅខេត្តកណ្តាល។ 

លោក ជី ស៊ីវុត្ថា អនុប្រធានប្រចាំការ ស.ស.យ.ក ខេត្តកណ្តាល បានលើកទឹកចិត្តដល់សមាជិក-សមាជិកត្រូវចូលរួមឱ្យបានសកម្មក្នុងនាមជាអ្នកសង្កេតការណ៍ដំណើរការនៃការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អោយប្រព្រឹត្តទៅដោយភាពរលូន។ 

លោក ជី ស៊ីវុត្ថា បានលើកឡើងថា៖ការលះបង់ ការតាំងចិត្ត និងឆន្ទៈចំពោះសកម្មភាពស្ម័គ្រចិត្តរបស់ ស.ស.យ.ក បានផ្តល់ភាពជាគំរូសម្រាប់យុវជនដទៃទៀតយកគំរូតាម។ មិនថាសកម្មភាពក្នុងវិស័យណានោះទេ ស.ស.យ.ក តែងតែប្រកាន់ខ្ជាប់ជានិច្ចនូវស្មារតីនៃការយកចិត្តទុកដាក់ខ្ពស់ និងជំរុញទឹកចិត្តខ្លួនឯងឲ្យក្លាយជាចំណែកនៃដំណោះស្រាយវិជ្ជមាន ជាជាងធ្វើជាបន្ទុក ឬអំរែករបស់សង្គមជាតិ។ សកម្មភាពទាំងអស់នេះក៏ជាការអប់រំនូវផ្នត់គំនិតយុវជនឲ្យចេះលះបង់ ហើយចូលរួមចំណែកដើម្បីសម្រេចប្រយោជន៍រួមផងដែរ។ 

លោកសង្ឃឹមយ៉ាងមុតមាំថា វគ្គបណ្តុះបណ្តាលស្តីពីដំណើរការនៃការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌអាណត្តិទី៤ ឆ្នាំ២០២៤ជាផ្នែកមួយដ៏មានសារសំខាន់ក្នុងការចូលរួមក្នុងកិច្ចការងារសង្គម និងជាផលប្រយោជន៍សម្រាប់ប្រទេសជាតិទាំងមូល។ 

លោកអនុប្រធានប្រចាំការបានស្នើឱ្យសមាជិក-សមាជិកាដែលចូលរួមវគ្គបណ្តុះបណ្តាលនាពេលនេះ ត្រូវយកចំណេះដឹងទាំងនេះទៅអនុវត្តរួមមាន៖សិទ្ធ តួនាទី និងភារកិច្ចរបស់អ្នកសង្កេតការណ៍ មុនថ្ងៃបោះឆ្នោត ក្នុងថ្ងៃបោះឆ្នោត ស្របតាមនិតិវិធីច្បាប់នៃការបោះឆ្នោតឱ្យទទួលបាននូវលទ្ធផលជោគជ័យ៕SRN