តំបន់ប្រវត្តិសាស្រ្តដំណើរឆ្ពោះទៅការផ្តួលរំលំរបបប្រល័យពូជសាសន៍កំពុងបន្តអភិវឌ្ឍន៍លើហេដ្ឋារចនាសម្ព័ន្ធជាច្រើន ខណះដែលប្រមុខរាជរដ្ឋាភិបាលរំលឹកខួបអនុស្សាវរីយ៍លើកទី៤៧ឆ្នាំ

ត្បូងឃ្មុំ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាអញ្ជើញជាអធិបតីក្នុងពិធីខួបអនុស្សាវរីយ៍លើកទី៤៧ ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត «២០ មិថុនា ១៩៧៧ – ២០ មិថុនា ២០២៤»នៅតំបន់ប្រវត្តិសាស្ត្រយោធាតេជោកោះថ្ម X16 ឃុំទន្លូង ស្រុកមេមត់ ខេត្តត្បូងឃ្មុំ នាព្រឹកថ្ងៃទី ២០ ខែ មិថុនា ឆ្នាំ ២០២៤។

ឯកឧត្តមបណិ្ឌត ជាម ច័ន្ទសោភ័ណ អភិបាល នៃគណៈអភិបាលខេត្តត្បូងឃ្មុំ បានថ្លែងថា “នៅក្នុងអំឡុងពេលប៉ុន្មានឆ្នាំចុងក្រោយនេះ គណៈកម្មការសាងសង់វិមាន ឈ្នៈ ឈ្នៈ ដឹកនាំ ដោយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានបន្តយកចិត្តទុកដាក់អភិវឌ្ឍន៍គម្រោងតំបន់ប្រវត្តិសាស្ត្រយោធាតេជោកោះថ្ម X16និងបានបង្កើតក្រុមការងារទទួលបន្ទុកកិច្ចការអភិវឌ្ឍន៍ សម្រេចបានលទ្ធផលជាផ្លែផ្កាគួរឱ្យកត់សម្គាល់”។ ឯកឧត្តអភិបាល នៃគណៈអភិបាលខេត្តត្បូងឃ្មុំ បានបន្តថា “ឯកឧត្តម នាយឧត្តមសេនីយ៍សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេស និងជាប្រធានក្រុមការងាររៀបចំពិធី ដឹកនាំ និងដំណើរការសាងសង់រួចរាល់ហេដ្ឋារចនាសម្ព័ន្ធ មានជាអាទិ៍៖សាង់សងអគារវេទិកាអចិន្ត្រៃយ៍ ទំហំ ៦,១មx៤៧ម ចំនួន ១ខ្នង, សាងសង់ទីលានបាល់ទាត់ លើដីទំហំ ៦៨មx១០៥ម, ជីកស្រះមួយ មានទំហំ ៧០មx៧០ម ជម្រៅជាង ១០ម៉ែត្រ ដោយមានចម្លាក់រូបនាគពីថ្មភក់ព័ទ្ធជុំវិញ, សាងសង់ប្រាង្គ និងចម្លាក់ព្រះអង្គគោកធ្លក, សាងសង់សាលាដំណាក់ ទំហំ ៦,១មx១៩,៦ម ចំនួន ១ខ្នង កម្ពស់ ១ជាន់, សាងសង់អគារមិត្តភាព ១ខ្នង កម្ពស់ ១ជាន់ ដោយមានបំពាក់គ្រឿងសង្ហារឹម និងសម្ភារបច្ចេកទេសLED, កុំព្យូទ័រ ប្រព័ន្ធកាមេរ៉ាសុវត្ថិភាព ក្រោមជំនួយឥតសំណងរបស់ក្រសួងការពារជាតិប្រទេសវៀតណាម, ដាក់បង្គោល និងតបណ្តាញអគ្គិសនី, រៀបចំប្រព័ន្ធលូរំដោះទឹក, ចាក់បេតុងធ្វើផ្លូវ ក្រាលថ្មម៉ិច ដាំកូនឈើ ដាំស្មៅលម្អ និងធ្វើទីលានចតឧទ្ធម្ភាគចក្រ៥ទីតាំង។ ចំពោះគម្រោងសាងសង់ហេដ្ឋារចនាសម្ព័ន្ធខាងលើនេះ ក្រុមការងារទទួលបានថវិកា គាំទ្រឧបត្ថម្ភពីក្រសួងការពារជាតិ ប្រទេសវៀតណាម និងថវិកាពីសប្បុរសជននានា ដោយមិនប្រើប្រាស់ថវិការដ្ឋឡើយ”។

ឯកឧត្តអភិបាល នៃគណៈអភិបាលខេត្តត្បូងឃ្មុំ បានបញ្ជាក់ថា “ក្រៅពីសមិទ្ធផលនេះ ក៏មានការស្ថាបនាផ្លូវក្រវ៉ាត់ព្រំដែនប្រវែងជាង១៤៤គីឡូម៉ែត្រ, ស្ថាបនាផ្លូវក្រាលកៅស៊ូពីផ្លូវជាតិលេខ៧ ដល់តំបន់ប្រវត្តិសាស្ត្រយោធាតេជោកោះថ្មប្រវែងជិត១០គីឡូម៉ែត្រ, ដំឡើងបង្គោលអង់ទែនទូរស័ព្ទ និងបំពាក់ឧបករណ៍ប្រព័ន្ធ អ៊ិនធើណែត, សាងសង់សារមន្ទីរតេជោកោះថ្ម និងបណ្តាញអគ្គិសនី និងបំពាក់អំពូលភ្លើងបំភ្លឺផ្លូវ ពីផ្លូវជាតិលេខ៧ ដល់តំបន់ប្រវត្តិសាស្ត្រយោធាតេជោកោះថ្ម។

បន្ថែមលើនេះ អាគារទទួលភ្ញៀវ និងអាគារស្នាក់នៅ នឹងត្រូវបានគម្រោងបញ្ចុះបឋមសិលាសាងសង់នៅថ្ងៃទី២០ មិថុនា ឆ្នាំ២០២៤នេះ ដោយចំណាយអស់ថវិកាសរុបប្រមាណ១លាន២សែនដុល្លារ៕