SRNTV TV ONLINE CAMBODIA
កណ្តាល៖ ប្រធានក្រុមការងារគណបក្សប្រជាជនកម្ពុជា ( CPP ) ចុះមូលដ្ឋាន ស្រុកចំការលើ ខេត្តកំពង់ចាម បានសម្រេចបញ្ចប់តួនាទីលោក ឌួង ឆាយ ពីអនុប្រធានក្រុមការងារចុះមូលដ្ឋានឃុំបុសខ្នុរ។
នៅក្នុងសេចក្ដីសម្រេចរបស់ប្រធានក្រុមការងារគណបក្សចុះមូលដ្ឋានស្រុកចំការលើ ឯកឧត្តម ហ៊ុន ម៉ានិត ចុះថ្ងៃទី១៧ ខែកុម្ភៈ ឆ្នាំ២០២២នេះ បានសម្រេចបញ្ចប់តួនាទីលោក ឌួង ឆាយ ពីអនុប្រធានក្រុមការងារចុះមូលដ្ឋានឃុំបុសខ្នុរ ស្រុកចំការលើ ខេត្តកំពង់ចាម ចាប់ពីថ្ងៃចុះហត្ថលេខានេះតទៅ។ទោះបីជាយ៉ាងណាក៍ដោយ ក្នុងសេចក្ដីសម្រេច នោះមិនបានបញ្ជាក់មូលហេតុជុំវិញការបញ្ចប់តួនាទីរបស់លោក ឌួង ឆាយ ទេ។
សូមបញ្ជាក់ផងដែរថា ការបញ្ចប់តួនាទីរបស់លោក ឌួង ឆាយ បានធ្វើឡើងក្រោយប៉ុន្មានថ្ងៃប៉ុណ្ណោះ បន្ទាប់ពីលោក ឌួង ងៀប ដែលត្រូវជាឪពុកខ្លួន ត្រូវបានតុលាការសម្រេចបញ្ជូនទៅឃុំខ្លួនជាបណ្ដោះអាសន្ននៅពន្ធនាគារ កាលពីថ្ងៃទី១៤ ខែកុម្ភៈ ឆ្នាំ២០២២ ដោយចោទប្រកាន់ពីបទ «ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន»។
គួររំលឹកដែរថា កាលពីខែមីនា ឆ្នាំ២០២១ ព្រះមហាក្សត្របានត្រាស់បង្គាប់បញ្ចប់គោរមងារ « ឧកញ៉ា » ពីលោក ឌួង ឆាយ តាមសំណើរបស់ សម្តេចតេជោ ហ៊ុន សែន ក្រោយពីអតីតភរិយារបស់លោក ឌួង ឆាយ បង្ហោះវីដេអូដែលស្វាមីខ្លួនប្រើហិង្សា ទៅលើរូបនាង នាពេលកន្លងមក៕SRN
