លោក គួច ចំរើន ស្នើដល់ប្រជាពលរដ្ឋជាម្ចាស់ក្បាលដី ដែលកាន់កាប់ស្របច្បាប់ ត្រូវចូលរួមសហការ ត្រៀមឯកសារ អត្តសញ្ញាណ និងបោះបង្គោលព្រំដីឱ្យបានត្រឹមត្រូវ

នាឱកាសនោះដែរ លោក គួច ចំរើន មានប្រសាសន៍ឱ្យដឹងនៅព្រឹកថ្ងៃទី៣០ ខែឧសភា ឆ្នាំ២០២២នេះថា៖ ថ្ងៃនេះយើងបានមកជួបជុំគ្នាជាថ្មីម្តងទៀត ដើម្បីប្រកាសកំណត់តំបន់វិនិច្ឆ័យដីធ្លីលក្ខណៈជាប្រព័ន្ធ ព្រមទាំងពាំនាំការផ្តាំផ្ញើសួរសុខទុក្ខ សេចក្តីនឹករលឹកពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រគេនដល់ព្រះតេជគុណគ្រប់ព្រះអង្គ និងបងប្អូនប្រជាពលរដ្ឋដែលបាននិមន្ត និងអញ្ជើញចូលរួមនៅពេលនេះ។

លោក គួច ចំរើន បានថ្លែងកោតសរសើរ និងវាយតម្លៃខ្ពស់ដល់អាជ្ញាធរមូលដ្ឋាន ក៏ដូចជាមន្ទីររៀបចំដែនដី នគរូបនីយកម្ម សំណង់ និងសុរិយោដី ដែលបានខិតខំចុះបញ្ជីដីធ្លីជូនប្រជាពលរដ្ឋ និងផ្តល់បណ្ណកម្មសិទ្ធិជូនប្រជាពលរដ្ឋបានជាង៣ម៉ឺនបណ្ណនាឆ្នាំកន្លងមក។ ថ្ងៃនេះក្រុមការងារបានចុះកំណត់តំបន់វិនិច្ឆ័យដីធ្លីនៅភូមិទាំង០៣ នៃឃុំកំពង់សីលា ស្រុកកំពង់សីលា ហើយនៅមានរាប់ម៉ឺនក្បាលដីទៀត ដែលត្រូវកំណត់ជាតំបន់វិនិច្ឆ័យចុះបញ្ជីដីធ្លីជូនប្រជាពលរដ្ឋនៅពេលខាងមុខ។

ជាមួយគ្នានេះ លោកអភិបាលខេត្ត បានស្នើដល់បងប្អូនប្រជាពលរដ្ឋ ជាម្ចាស់ក្បាលដីដែលបានកាន់កាប់ស្របច្បាប់ ត្រូវចូលរួមសហការ ត្រៀមឯកសារ អត្តសញ្ញាណ និងបោះបង្គោលព្រំដីឱ្យបានត្រឹមត្រូវ ដើម្បីឱ្យមន្ត្រីចុះបំពេញការងារបានលឿនឆាប់រហ័ស។ បន្ទាប់ពីឃុំនេះទៅ យើងនឹងបន្តការចុះបញ្ជីដីធ្លីលក្ខណៈជាប្រព័ន្ធនៅឃុំស្ទឹងឆាយ និងឃុំចំការហ្លួង ស្រុកកំពង់សីលាបន្តទៀត។ យើងត្រូវជំនះឧបសគ្គយ៉ាងច្រើនដើម្បីផលប្រយោជន៍ប្រជាពលរដ្ឋរបស់យើង។

ក្នុងឱកាសនោះ លោកអភិបាលខេត្ត ក៏បានអំពាវនាវឱ្យប្រជាពលរដ្ឋទៅចាក់វ៉ាក់សាំងឱ្យបានគ្រប់ៗគ្នា និងគ្រប់ដូស ដើម្បីសុខភាពខ្លួនយើង ក្រុមគ្រួសារ និងសង្គមជាតិ៕ដោយ៖ សិរី នាគ