Breaking News

យេនឌ័រ និងបំណិនជីវិត ដើម្បីបង្កើនសេដ្ឋកិច្ចគ្រួសារជូនប្រជាពលរដ្ឋ

ខេត្តកណ្ដាល៖ ដើម្បីបង្កើនភាពអង់អាចផ្នែកសេដ្ឋកិច្ចដល់ស្ត្រី ការកាត់បន្ថយភាពក្រីក្រ និងបង្កើនសេដ្ឋកិច្ចគ្រួសារជូនដល់ប្រជាពលរដ្ឋនៅក្នុងសហគមន៍ ដែលស្ត្រីមេផ្ទះក៏អាចរកប្រាក់ចំណូលបាន កាត់បន្ថយចំណាយនៅក្នុងគ្រួសារ តាមរយៈការផលិតសាប៊ូ ដែលមានវត្ថុធាតុដើមងាយស្រួលរក និងចំណាយនូវថវិកាក្នុងការផលិតតិច ។  

លោកស្រី ជុំ ស៊ីណាត ប្រធានមន្ទីរកិច្ចការនារីខេត្តកណ្ដាល បានលើកឡើងបែបនេះក្នុងវគ្គបណ្ដុះបណ្ដាលស្ដីពីយេនឌ័រ និងបំណិនជីវិត ដើម្បីបង្កើនសេដ្ឋកិច្ចគ្រួសារជូនប្រជាពលរដ្ឋ ដោយបានយកវគ្គបណ្ដុះបណ្ដាលមួយស្ដីពីការផលិតសាប៊ូ ជូនប្រជាពលរដ្ឋរស់នៅឃុំសំបួរមាស ស្រុកមុខកំពូល ខេត្តកណ្ដាល នាព្រឹកថ្ងៃទី២៧ ខែមិថុនា ឆ្នាំ២០២២។ 

លោកស្រីប្រធានមន្ទីរកិច្ចការនារីខេត្ដកណ្ដាល បន្តថា ស្ត្រីមេផ្ទះដែលអាចបង្កើនចំណូលជូនគ្រួសារបាន គឺពិតជាមានសារៈសំខាន់ខ្លាំងណាស់ ក្នុងការកាត់បន្ថយចំណាយនៅក្នុងគ្រួសារ ក៏ដូចជាកាត់បន្ថយនៅភាពក្រីក្រ ព្រមទាំងកាត់បន្ថយអំពើហិង្សានៅក្នុងគ្រួសារផងដែរ។  

ទន្ទឹមនឹងនោះវគ្គបណ្ដុះបណ្ដាលនេះ ពិតជាបានរួមចំណែកយ៉ាងសំខាន់ ជាមួយរាជរដ្ឋាភិបាល ក្នុងការអនុវត្តន៍គោលនយោបាយកាត់បន្ថយភាពក្រីក្រ និងបង្កើននូវសេដ្ឋកិច្ចជាតិផងដែរ។ ជាងនេះទៀតវគ្គបណ្ដុះបណ្ដាលនេះ មានគោលបំណងសំខាន់ ចង់អោយប្រជាពលរដ្ឋយល់ដឹងពីតួនាទីភារកិច្ចរបស់ស្ត្រី និងបុរស អោយចេះជួយសម្រាលការងារគ្នាទៅវិញទៅមកនៅក្នុងក្រុមគ្រួសារ រឺក្នុងសង្គម ដោយមិនចាំបាច់ប្រកាន់ការងារបុរស រឺ ស្រ្តី  កាត់បន្ថយការចំណាយ ចេះបង្កើនប្រាក់ចំណូល និងកាត់បន្ថយអំពើហិង្សាក្នុងគ្រួសារ។ 

សូមបញ្ជាក់ផងដែរថា៖ វគ្គបណ្ដុះបណ្ដាលនេះមានគ្រូជំនាញផ្នែកផលិតសាប៊ូ មកបង្ហាត់បង្រៀនពីរបៀបធ្វើផងដែរ៖

*វិធីទី១ អំពីទ្រឹស្តី បានបង្ហាញនូវធាតុផ្សំដែលត្រូវយកមកធ្វើបានមានដូចជា៖ ក្រូចសើច ,ក្រូចឆ្មារ ,សំបកម្នាស់ ឬផ្លែត្រសក់ស្រូវ ចំនួន ៣គីឡូក្រាម ,ស្ករស ១គីឡូក្រាម ,ទឹកស្អាត ១០លីត្រ ,អំបិល ១គីឡូក្រាម និងមេសាប៊ូ ១គីឡូក្រាម។

*វិធីទី២ បានបង្ហាញនូវការអនុវត្តន៍ ៖ ដោយដាក់ត្រាំចូលគ្នាទុកយៈពេលចាប់ពីកន្លះខែឡើងទៅ បន្ទាប់មកយកទឹកដែលបានត្រាំចំនួន ៤លីត្រ លាយជាមួយអំបិលចំនួន ១គីឡូក្រាម មេសាប៊ូ ១គីឡូក្រាម កូរៗរួចបន្ថែមទឹកស្អាតចំនួន ៥លីត្រទៀត កូរៗបន្តរហូតរលាយជាសាច់មួយ នោះយើងនឹងទទួលបាននូវសាប៊ូដែលអាចប្រើប្រាស់បាន៕ដោយ៖ សិរី នាគ

 

Check Also

អ្នកនាំពាក្យស្នងការរាជធានី ច្រានចោលការចុះផ្សាយព័ត៌មានមិនពិតពីការតាមចាប់ខ្លួនគ្រូបង្រៀនម្នាក់ដែលប្រើអំពើហិង្សាលើកុមារ

Leave a Reply

Your email address will not be published. Required fields are marked *