SRNTV TV ONLINE CAMBODIA
ភ្នំពេញ ៖ បុរសពីរនាក់ចេញពីក្លឹបកម្សាន្តបើករថយន្តលឿនរ៉េចង្កូតទៅបុករះម៉ូតូឡាំប្រឺតា និងបន្តបុករបងការដ្ឋានសំណង់នៅក្បែរនោះទៀត បណ្តាលឲ្យរងការខូចខាត សំណាងល្អមិនបណ្តាលឲ្យមានអ្នករងរបួស។
ហេតុការណ៌គ្រោះថ្នាក់ចរាចរណ៌នេះបង្កឱ្យមានការភ្ញាក់ផ្អើលឡ់ងកាលពីម៉ោង៣និង១៥ទៀបភ្លឺ ថ្ងៃទី១២ ខែកក្កដា ឆ្នាំ២០២២ នៅតាមបណ្តោយមហាវិថីព្រះសុធារស កែងផ្លូវលេខ២៩៤ ស្ថិតក្នុងសង្កាត់ទន្លេបាសាក់ ខណ្ឌចំការមន ។
ប្រភពពត៌មានពីម្ចាស់ម៉ូតូឡាំប្រឺតាបានឲ្យដឹងថា មុនពេលកើតហេតុ គាត់បានដឹកភ្ញៀវនារី២នាក់ធ្វើដំណើរតាមបណ្ដោយមហាវិថីព្រះសុធារស ហើយបានឈប់ម៉ូតូឡាំប្រឺតាដើម្បីរង់ចាំភ្ញៀវចុះទិញអីវ៉ាន់ ពេលនោះស្រាប់តែមានម៉ូតូឡាំប្រឺតាមួយគ្រឿងទៀតមកឈប់ពីក្រោយម៉ូតូឡាំប្រឺតារបស់គាត់ ។
ប្រភពពត៌មានបន្តទៀតថា ខណៈនោះដែរស្រាប់តែមានរថយន្តមួយគ្រឿងម៉ាក Lexus GS300 ពណ៌ខ្មៅ ពាក់ស្លាកលេខ ភ្នំពេញ2BD-6494 បើកបរនឹងរួមដំណើរដោយបុរស២នាក់ទើបនឹងចេញពីក្លឹបកម្សាន្ត ទំនងជាស្រវឹងស្រា បើករថយន្តយ៉ាងលឿនតាមបណ្ដោយមហាវិថីព្រះសុធារស ក្នុងទិសដៅពីត្បូងទៅជើង ខណៈធ្វើដំណើរមកដល់ចំណុចកើតហេតុ ស្រាប់តែរថយន្តនោះរ៉េចង្កូតទៅខាងស្តាំបុករះម៉ូតូឡាំប្រឺតា២គ្រឿង រងការខូចខាតតិចតួច និងបន្តទៅបុករបងការដ្ឋានសំណង់នៅក្បែរកន្លែងកើតហេតុទៀត បណ្ដាលឱ្យរលំរបងស័ង្កសីមួយផ្ទាំង ចំណែករថយន្តវិញ រងការខូចខាតមួយកំណាត់។
បន្ទាប់ពីកើតហេតុ ម្ចាស់រថយន្តបានចេញមកសំពះសុំទោស ម្ចាស់ម៉ូតូឡាំប្រឺតា ព្រមទាំងចរចាសងការខូចទៅម្ចាស់ម៉ូតូឡាំប្រឺតា ដើម្បីបញ្ចប់រឿងនៅកន្លែងកើតហេតុ។ ចំណែករបងការដ្ឋានសំណង់មិនទាន់មានដំណោះស្រាយនោះទេ ទើបសមត្ថកិច្ចជំនាញចរាចរវាស់វែងយករថយន្តទៅរក្សាទុកនៅអធិកាដ្ឋានខណ្ឌចំការមនជាបណ្តោះអាសន្នរង់ចាំម្ចាស់រថយន្តចូលខ្លួនមកដោះស្រាយគ្នាជាមួយខាងការដ្ឋាននៅពេលក្រោយ៕
