SRNTV TV ONLINE CAMBODIA
ខេត្តកណ្តាល៖ ជនសង្ស័យ ២នាក់ ត្រូវបានកម្លាំងនគរបាលស្រុកកណ្ដាលស្ទឹង ឃាត់ខ្លួនកាលពីព្រឹកថ្ងៃទី ០២ ខែ សីហា ឆ្នាំ ២០២២ ក្រោយពីបានយកដុំឥដ្ឋការ៉ូឡាគប់ប្រជាការពារម្នាក់ បណ្ដោយឱ្យដួលសន្លប់បោកក្បាលទៅនឹងផ្លូវជាតិ ។ អំពើហិង្សាដោយចេតនានេះ បានកើតឡើងកាលពីវេលាម៉ោងជាង ៦ល្ងាច ថ្ងៃទី ០១ ខែ សីហា ឆ្នាំ ២០២២ នៅចំណុចភូមិចំបក់ ឃុំសៀមរាប ស្រុកកណ្ដាលស្ទឹង ខេត្តកណ្ដាល ។
នគរបាលស្រុកកណ្ដាលស្ទឹងបានឲ្យដឹងថា ជនរងគ្រោះមានឈ្មោះ ផាន់ សុភ័ក្រ្ត អាយុ ៥៥ ឆ្នាំ មុខរបរ កសិករ និងជាប្រជាការពារ មានទីលំនៅបច្ចុប្បន្នភូមិសៀមរាប ឃុំសៀមរាប ស្រុកកណ្ដាលស្ទឹង ខេត្តកណ្ដាល ។ ចំណែកជនសង្ស័យពីរនាក់ខាងលើ ទី១-ឈ្មោះ ហួរ តូម៉ា ភេទ ប្រុស អាយុ ៣០ មុខរបរ មិនពិតប្រាកដ និងទី២-ឈ្មោះ ផល មេត្តា ភេទ ប្រុស អាយុ ១៨ ឆ្នាំ មុខរបរ មិនពិតប្រាកដ ។ ជនសង្ស័យទាំងពីរ មានទីលំភូមិចំបក់ ឃុំសៀមរាប ស្រុកកណ្ដាលស្ទឹង ខេត្តកណ្ដាល ។
នគរបាលបានឱ្យដឹងទៀតថា កាលពីថ្ងៃទី ០១ ខែ សីហា ឆ្នាំ ២០២២ វេលាម៉ោងប្រមាណជាង ៦ល្ងាច ខណៈជនរងគ្រោះ (ប្រជាការពារ) កំពុងឈរយាមនៅគោលដៅចំណុចផ្លូវបេតុង ក្នុងភូមិសៀមរាប ឃុំសៀមរាប ពេលនោះមានក្រុមការងារប្រជាការពារបានហៅតាមវិទ្យុទាក់ទងប្រាប់ថា មុខសញ្ញាលួចដែកកាលពីព្រឹកមិញ ពួកវាយកដែកទៅលក់ទៀតហើយ ទៅទិសខាងជើង ពេលនោះជនរងគ្រោះបានជិះម៉ូតូចេញទៅដល់ចំណុចកើតហេតុបានឃើញជនសង្ស័យទាំងពីរនាក់ដើរត្រឡប់មកទិសខាងត្បូងវិញ និងបានប្រតាយប្រតប់ជាមួយប្រជាការពារ ពេលនោះជនរងគ្រោះបានចូលទៅឃាត់នឹងសួរនាំ ស្រាប់តែជនសង្ស័យឈ្មោះ ហួរ តូម៉ា បានយកដុំឥដ្ឋការ៉ូឡាគប់មកលើជនរងគ្រោះចំថ្ងាសផ្នែកខាងស្ដាំ បណ្ដោយជនរងគ្រោះដួលសន្លប់បោកក្បាលទៅនឹងផ្លូវជាតិ រួចនាំគ្នារត់ខ្លួនអស់ ។ លុះព្រឹកឡើង ថ្ងៃទី ០២ ខែ សីហា ឆ្នាំ ២០២២ កម្លាំងនគរបាលប៉ុស្តិ៍នគរបាលរដ្ឋបាលសៀមរាប បានឃាត់ខ្លួនជនសង្ស័យពីរនាក់ បញ្ជូនមកកាន់អធិការដ្ឋាននគរបាលស្រុកកណ្ដាលស្ទឹងដើម្បីកសាងសំណុំរឿងតាមនីតិវិធីច្បាប់ ៕
