មន្ត្រីជាថ្នាក់ដឹកនាំណាដែលមិនអាចអនុវត្តទួនាទីភារ:កិច្ចរបស់ខ្លួនបានត្រូវដាក់ពាក្យលាលែងបន្ទាន់

December 14, 2022 ព័ត៌មានជាតិ

(ខេត្តកំពត)៖ នេះជាប្រសាសន៍ក្រើនរំឮករបស់លោក ម៉ៅ ធនិន អភិបាលខេត្តកំពត ថ្លែងនៅក្នុងពិធីប្រកាសចូលកាន់មុខតំណែង អភិបាលស្រុកបន្ទាយមាសកាលពីថ្ងៃទី១៣ខែធ្នូឆ្នាំ២០២២ ដែលលោកបានអញ្ជើញចូលរួមជាអធិបតីយដ៏ខ្ពស់ខ្ពស់នាពេលនោះ។

ក្នុងពិធីដែលបានរៀបចំឡើងកាលពីព្រឹកថ្ងៃទី១៣ ខែធ្នូ ឆ្នាំ២០២២ នៅបរិវេណសាលាស្រុកបន្ទាយមាស លោកម៉ៅ ធនិន អភិបាលខេត្តកំពតបានមមានប្រសាសន៍ថា:ថ្នាក់ដឹកនាំជុំវិញខេត្តត្រូវប្រើប្រាស់អំណាច និងតួនាទីរបស់ខ្លួនដើម្បីជាប្រយោជន៍សម្រាប់សង្គម។ ក្នុងនាមជាថ្នាក់ដឹកនាំមិនត្រូវយកតួនាទីដែលបានពីរាស្ត្រតាមរយៈរាជរដ្ឋាភិបាលទៅធ្វើឲ្យពលរដ្ឋណាម្នាក់ឈឺចាប់ឡើយ។ ម្យ៉ាងទៀត មន្ត្រីចាប់ពីស្មៀនឃុំសង្កាត់ នាយប៉ុស្តិ៍រដ្ឋបាលឡើងទៅ ប្រសិនបើដឹងថាមិនអាចអនុវត្តតួនាទីភារកិច្ចរបស់ខ្លួនបានទេនោះត្រូវដាក់ពាក្យសុំលាឈប់ពីការងារជាបន្ទាន់។ លោកអភិបាលខេត្តបានបន្តថាក្នុងនាមរដ្ឋបាលខេត្ត លោកមិនបណ្តែតបណ្តោយឲ្យមន្ត្រីណាម្នាក់យកតួនាទី និងអំណាចធ្វើអាជីវកម្ម ឬបម្រើផលប្រយោជន៍ផ្ទាល់ខ្លួនដាច់ខាត។ ផ្ទុយទៅវិញ មន្ត្រីជាថ្នាក់ដឹកនាំត្រូវប្រែក្លាយខ្លួនជាអ្នកជួយសង្គ្រោះរាស្ត្រ ដោយមើលគំរូរបស់ប្រមុខរាជរដ្ឋាភិបាលដែលលោកបានលះបង់គ្រប់យ៉ាងដើម្បីប្រជាពលរដ្ឋ និងប្រទេសជាតិទាំងមូល។ ម្ល៉ោះហើយ បើថ្នាក់ដឹកនាំណាម្នាក់បានដឹងខ្លួនថាធ្លាប់មានឥរិយាបថ ឬប្រព្រឹត្តមិនសមរម្យកន្លងមកសូមកែប្រែជាបន្ទាន់។

សូមបញ្ជាក់ថា: ពិធីនេះត្រូវបានប្រកាសតែងតាំងលោកនូ ច័ន្ទដា ប្រធានអង្គភាពច្រកចេញចូលតែមួយនៃរដ្ឋបាលខេត្តកំពតជាអភិបាលស្រុកបន្ទាយមាសជំនួសលោកស៊ីវ ផេងដែលបានទទួលតំណែងជាអភិបាលរងខេត្តកំពត៕ដោយ៖ សិរី នាគ