Breaking News

ដកបញ្ឈរជើង​មន្ត្រី​ចរាចរណ៍​ខេត្តកំពង់ស្ពឺ​១០​នាក់​ពាក់ព័ន្ធ​ករណី​ផាកពិន័យ​មិន​ចេញ​វិក្កយបត្រ

​កំពង់ស្ពឺ​៖ ស្នងការដ្ឋាន​នគរបាល​ខេត្ត​កំពង់ស្ពឺ​បាន​ស្រាវជ្រាវ និង​ដាក់​ចំណាត់ការ​លើ​មន្ដ្រី​ចរាចរណ៍​ចំនួន​១០​នាក់ ដែល​អនុវត្ត​ការងារ​នៅ​គោលដៅ​ផ្លូវជាតិ​លេខ​៤ ត្រង់គីឡូម៉ែត្រលេខ៧៩ និង៨០ ដោយ​ដក​បញ្ឈរជើង​បណ្ដោះអាសន្ន​នៅ​ការិយាល័យ​បុគ្គលិក និង​បន្ដ​ស្រាវជ្រាវ​ដើម្បី​ចាត់ការ​តាម​នីតិវិធី​។ ការ​បញ្ឈរជើង​មន្ត្រី​ចរាចរណ៍​ទាំង​១០​នេះ ក្រោយ​ផ្ទុះ​រឿងរ៉ាវ​ពាក់ព័ន្ធ​នឹង​ការផាកពិន័យ​ម្ចាស់​រថយន្ត​ល្មើសច្បាប់​មួយ​គ្រឿង​ដោយ​មិន​ចេញ​វិក្កយបត្រ​។ នេះ​បើ​យោង​តាម​ការបញ្ជាក់​នៅលើ​ទំព័រ​ហ្វេ​សប៊ុក​ផ្លូវកា​ររបស់​ស្នងការដ្ឋាន​នគរបាល​ខេត្ត​កំពង់ស្ពឺ កាលពី​ថ្ងៃ​ទី​១៦ ខែ​មករា ឆ្នាំ​២០២៣​។​

​ដោយឡែក​ចំពោះ​ម្ចាស់​រថយន្ត​ល្មើសច្បាប់​ដែល​ត្រូវ​មន្ត្រី​ចរាចរណ៍​ផាកពិន័យ ស្នងការដ្ឋាន​នគរបាល​ខេត្ត​កំពង់ស្ពឺ​ថា សមត្ថកិច្ច​កំពុង​ស្រាវជ្រាវ​ទាក់ទង​សុំ​ជួប និង​ប្រគល់​ថវិកា​២០០​ដុល្លា​ដែល​មន្ត្រី​ចរាចរណ៍​ជូន​ម្ចាស់​រថយន្ត​ល្មើសច្បាប់​នោះ​វិញ​។​

​គួរ​ជម្រាប​ថា កាល​ពី​ថៃ្ង​ទី​១៦ ខែ​មករា មាន​គណនី​ហ្វេ​សប៊ុក​ឈ្មោះ “​គង្គារ លំអរ​មង្គល​”​មួយ​បាន​បង្ហោះ​ជា​សាធារណៈ​ដោយ​បាន​លើកឡើង​ថា ប៉ូលិស​កំពង់ស្ពឺ​ផាកពិន័យ​សាហាវ និង​បន្លំ​មិន​ឱ្យ​វិក័យប័ត្រ​ទៀត​។ ម្ចាស់​គណនី​ហ្វេ​សប៊ុក​ដដែល​ថែមទាំង​លើកឡើង​ទៀត​ថា ក្រៅ​ពី​មិន​ចេញ​វិក្កយបត្រ​ឱ្យ​ហើយ ប៉ូលិស​ថែមទាំង​យក​ទូរស័ព្ទ​របស់​ខ្លួន​លុប​រូប​ចេញ​ទៀត​។​

​ភ្លាមៗ​ក្រោយ​ទទួលបាន​ព័ត៌មាន​នេះ ស្នងការដ្ឋាន​នគរបាល​ខេត្ដ​កំពង់ស្ពឺ បាន​ឆែក​និង​ពិនិត្យ​ស្វែងរក​ឈ្មោះ​គណនេយ្យ​ធនាគារ​ABA ដែល​មានឈ្មោះ​ជា​ភាសា​អង់គ្លេស​Khem Sothearith ដែល​អះអាង​ថា​ជា​នគរបាល​ខេត្ដ​កំពង់ស្ពឺ​។ ជា​លទ្ធផល​គណនេយ្យ​ធនាគារ​ABA​នេះ​ពិត​ជា​របស់​លោក​អនុសេនីយ៍ឯក​ខែម សុធារិទ្ធ អត្ដ​លេខ​៧៥៧៤៣ តួនាទី​នាយ​ផ្នែក​ការិយាល័យ​ចរាចរណ៍​ផ្លូវគោក នៃ​ស្នងការដ្ឋាន​នគរបាល​ខេត្ត​កំពង់ស្ពឺ​ពិតមែន​។​

​សូមជម្រាបថា កាលពី​ថ្ងៃ​ទី​១៤ ខែ​មករា ឆ្នាំ​២០២៣ សមត្ថកិច្ច​នគរបាល​ចរាចរណ៍​ខេត្ដ​កំពង់ស្ពឺ​បាន​បំពេញ​បេសកកម្ម​រឹតបណ្ដឹង​ច្បាប់​ចរាចរណ៍​ផ្លូវគោក​នៅ​ចំណុច​ផ្លូវជាតិ​លេខ​៤ គីឡូម៉ែត្រ​៧៩​និង​៨០ ដោយ​បាន​ឃាត់​រថយន្ដ​កូរ៉េ​ដឹកទំនិញ​សំពីងសំពោង​មួយគ្រឿង​។ រថយន្ត​កូរ៉េ​នេះ​មាន​ពាក់​ស្លាក​លេខ​ភ្នំពេញ 2BP4662 បើកបរ​ក្នុង​ទិសដៅ​ពី​ខាងកើត​ទៅ​លិច​ឆ្ពោះទៅ​ខេត្ដ​ព្រះសីហនុ សមត្ថកិច្ច​បាន​ឃាត់​ពិនិត្យ​រកឃើញ​អ្នកបើកបរ​ឈ្មោះ​នី  វ៉ាន់​ហេង ភេទ​ប្រុស អាយុ​២២​ឆ្នាំ គ្មាន​ប័ណ្ណ​បើកបរ និង​ដឹក​ទំនិញ​សំពីងសំពោង​ល្មើសច្បាប់​។​

​សមត្ថកិច្ច​បាន​ឱ្យដឹង​ថា រថយន្ត​កូរ៉េ​ដែល​ល្មើសច្បាប់​នេះ គឺ​ត្រូវ​ពិន័យ​១,២០០,០០០​រៀល និង​ពិន័យ​១៥០,០០០​រៀល​បន្ថែម​ល្មើស​ទំនិញ​សំពីងសំពោង​។ ប៉ុន្តែ​ពេលនោះ​អ្នករួមដំណើរ និង​ជា​ម្ចាស់​សំអាងការ​បាន​ប្រាប់​ប៉ូលិស​ថា សុំ​សម្រួល​ដោយ​សុំ​ជូន​ជា​ប្រាក់​២០០​ដុល្លារ តែ​សុំ​លេខ​ធនាគារ​ABA ដើម្បី​ឱ្យ​អ្នកផ្ទះ​បាញ់​លុយ​ចូល​ព្រោះ​ខ្លួន​មិន​មាន​ប្រាក់​ជាប់​ខ្លួន​ឡើយ​។ លុះ​ក្រោយ​បាញ់​លុយ​២០០​ដុល្លារ​ឱ្យ​សមត្ថកិច្ច​រួច​ក៏​បាន​បន្ដដំណើរ​ទៅ​បាត់​។​

​លើសពីនេះ ស្នងការដ្ឋាន​នគរបាល​ខេត្ត​កំពង់ស្ពឺ​បាន​អំពាវនាវ​ដល់​ប្រជាពលរដ្ឋ និង​សាធារណជន​ទាំងអស់​ឱ្យ​សហការ​ផ្ដល់​ព័ត៌មាន​នានា​ពាក់ព័ន្ធ​និង​អំពើ​អសកម្ម​របស់​មន្ដ្រីនគរបាល​ដែល​បាន​ប្រព្រឹត្ត​ខុសឆ្គង​និង​វិជ្ជាជីវៈ ដើម្បី​រួមចំណែក​ស្ថាបនា​កែ​លំ​ម្អ​រ​ចំណុច​ខ្វះខាត​៕

Check Also

មន្រ្តី​សុយោដី​ ម្នាក់ស្រវឹង​ស្រា បើកឡានឡេីងសួនច្បារបុកផ្ទាំងតាំងពិពណ៌សមទ្ធិផលមុខស្នាក់ការខេត្ដ(រង្វង់​មូ​ល​វិមានឯករាជ្យ​កំពង់ស្ពឺ​)​

Leave a Reply

Your email address will not be published. Required fields are marked *