សម្ដេចនាយឧត្តមសេនីយ៍ផុតលេខផ្កាយមាស៥ បញ្ជាឲ្យកងទ័ពទាំងអស់ទប់ស្កាត់​ឲ្យខាងតែបានរាល់ការប៉ុនប៉ងណាមួយ ដែលនាំឲ្យអសន្តិសុខដល់ជាតិ

ភ្នំពេញ៖ សម្តេចតេជោ ហ៊ុន សែន​ នាយឧត្តមសេនីយ៍ផុតលេខផ្កាយមាស៥ បានក្រើនរំឭកនិងបញ្ជាឲ្យកងយោធពលខេមរភូមិន្ទទាំងអស់ ត្រូវតែថែរក្សា និងការពារ​សុខសន្តិភាព​ឲ្យខាងតែបាន ហើយត្រូវទប់ស្កាត់ជាបន្ទាន់ចំពោះបុគ្គលណា ឬក្រុមណា ដែលមានចេតនាបំផ្លិតបំផ្លាញសន្តិភាពដែលកំពុងមានសព្វថ្ងៃនេះ។

«សុខសន្តិភាព គឺជាកត្តាធំបំផុតមិនអាចកាត់ថ្លៃបាន ក្នុងការអភិវឌ្ឍប្រទេសជាតិ និងធ្វើឲ្យប្រសើរឡើងជីវភាពរបស់ប្រជាជនប្រចាំថ្ងៃ ដូច្នេះមិនថាកាលៈទេសៈណានោះទេ ត្រូវថែរក្សាការពារឲ្យបាន»។ នេះជាប្រសាសន៍របស់សម្ដេចតេជោ ហ៊ុន សែន។

ជាមួយគ្នានេះ សម្តេចតេជោ ​បានថ្លែងអំណរគុណចំពោះនាយទាហាន នាយទាហានរង និងពលទាហាន នៃកងយោធពលខេមរភូមិន្ទទាំងអស់ ​ដែលបានលះបង់អស់កម្លាំងកាយចិត្ត ក្នុងកិច្ចការពារសុខ​សន្តិភាព សណ្តាប់ធ្នាប់ជូនដល់ប្រជាជន និងប្រទេសជាតិ។

«គុណបំណាច់យ៉ាងធំធេងរបស់កងយោធពលខេមរភូមិន្ទ មិនអាចបំភ្លេចបាននោះទេ ចំពោះលះបង់ និងការពលីគ្រប់បែបយ៉ាងសម្រាប់បូរណភាពទឹកដី»។ នេះជាការបញ្ជាក់របស់សម្ដេចនាយករដ្ឋមន្ដ្រី នៃកម្ពុជា។

សូមជម្រាបជូនថាការថ្លែងយ៉ាងដូច្នេះរបស់សម្តេចតេជោ ហ៊ុន សែន​ ក្នុងឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការ សមិទ្ធផលនានានៅបញ្ជាការដ្ឋាន​កងពលតូចលេខ៧០ នាព្រឹកថ្ងៃទី១២ ខែមិថុនា ឆ្នាំ២០២៣៕ដោយ៖ សិរី នាគ