SRNTV TV ONLINE CAMBODIA
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នៅព្រឹកថ្ងៃចន្ទ ទី២៦ ខែមិថុនា ឆ្នាំ២០២៣នេះ បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ «អគារសាលាយុត្តិធម្ម» ដែលមានទីតាំងនៅខណ្ឌជ្រោយចង្វារ ភ្នំពេញ។
«អគារសាលាយុត្តិធម្ម» ជាទីតាំងបម្រើការងាររបស់សាលាឧទ្ធរណ៍ភ្នំពេញ និងមហាអយ្យការអមសាលាឧទ្ធរណ៍ភ្នំពេញ និងសាលាដំបូងរាជធានីភ្នំពេញ និងអយ្យការអមសាលាដំបូងរាជធានីភ្នំពេញ។
អគារសាលាយុត្តិធម្មថ្មីនេះ បែងចែកជាពីរផ្នែក ដោយមួយផ្នែកជាទីតាំងបម្រើការងារថ្មីរបស់សាលាដំបូងរាជធានីភ្នំពេញ និងមួយផ្នែកទៀតជាទីតាំងបម្រើការងារថ្មីរបស់សាលាឧទ្ធរណ៍ភ្នំពេញ។ ការរៀបចំទីកន្លែង បំពេញការងារនៅកន្លែងតែមួយនេះ គឺយកលំនាំតាមការរៀបចំតុលាការដូចនៅប្រទេសបារាំង ហៅថា «វិមានយុត្តិធម៌» (Palais de Justice) ដើម្បីប្រមូលផ្ដុំការផ្តល់សេវាយុត្តិធម៌ឱ្យនៅជាមួយគ្នា ងាយស្រួលសម្រាប់អ្នកប្រើប្រាស់សេវានេះ។
សាលាដំបូង និងអយ្យការអមសាលាដំបូងរាជធានីភ្នំពេញ ទទួលបានផ្ទៃអគារប្រើប្រាស់ទំហំប្រមាណ ១២,០០០ម៉ែត្រក្រឡា (ធំជាងទីតាំងចាស់ជិត ២ដង ដោយទីតាំងចាស់មានផ្ទៃក្រឡាប្រមាណ ៦,៧២១ម៉ែត្រក្រឡាប៉ុណ្ណោះ) និងមានសាលសវនាការចំនួន១២ (កើនឡើងចំនួន ៧សាលសវនាការ)។ ដោយឡែកសាលាឧទ្ធរណ៍ និងមហាអយ្យការអមសាលាឧទ្ធរណ៍ភ្នំពេញ ទទួលបានផ្ទៃអគារសម្រាប់ប្រើប្រាស់សរុបប្រមាណ ៨,០០០ម៉ែត្រក្រឡា (ធំជាង ទីតាំងចាស់ ៥ដង ដោយទីតាំងចាស់មានផ្ទៃក្រឡាប្រមាណតែ ១,៥៧៧ម៉ែត្រក្រឡាប៉ុណ្ណោះ) និងមានសាលសវនាការ ចំនួន៥ (កើនឡើង ២ សាលសវនាការ)។
ទន្ទឹមនេះ អគារថ្មីនេះ ក៏មានផ្ទៃសម្រាប់ប្រើប្រាស់រួមគ្នាចំនួន ២,៧១៩ម៉ែត្រក្រឡាផងដែរ ជាអាទិ៍ សហសាលដ៏ធំមួយដែលអាចផ្ទុកមនុស្សបានប្រមាណ ៣១៥នាក់ និងមានទីតាំង សម្រាប់ប្រើប្រាស់ជាឃ្លាំងរក្សាទុកឯកសារសំណុំរឿងផងដែរ។
លោក កើត រិទ្ធ រដ្ឋមន្ត្រីក្រសួងយុត្តិធម៌ បានរំលឹកពីដំណើរដើមទងដែលនាំមានការសាងសង់ «អគារសាលាយុត្តិធម្ម» នេះថា ដោយសារទីតាំងបម្រើការងាររបស់សាលាដំបូងរាជធានីភ្នំពេញ និងសាលាឧទ្ធរណ៍ភ្នំពេញ មានទំហំតូច ហើយស្ថានភាពទីតាំងមិនអាចពង្រីកទីកន្លែងធ្វើការងារបាន ក៏ដូចជាមិនមានចំនួនសាលសវនាការគ្រប់គ្រាន់ ដើម្បីអាចឆ្លើយតបបានទៅនឹងតម្រូវការនៃការងារជាក់ស្តែងនោះ សម្ដេចតេជោនាយករដ្ឋមន្ត្រី បានសម្រេច ផ្តល់ដីមួយកន្លែងទំហំ ៩,៤៥៦ ម៉ែត្រក្រឡា ស្ថិតនៅតាមបណ្តោយផ្លូវលោកតាក្រហមក ភូមិព្រែកលាប សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ (ក្នុងតំបន់អភិវឌ្ឍន៍ OCIC) និងបានអនុញ្ញាតមានការសាងសង់នូវ អគារសាលាយុត្តិធម្មថ្មីដ៏ធំមួយនៅលើទីតាំងដីនេះ ដែលនឹងក្លាយជាកន្លែងបំពេញការងាររួមរបស់សាលាដំបូងរាជធានីភ្នំពេញ និងសាលាឧទ្ធរណ៍ភ្នំពេញ ព្រមទាំងអង្គការអយ្យការអមសាលាជម្រះក្តីទាំងពីរនេះ។
អគារសាលាយុត្តិធម៌ថ្មីដ៏ស្កឹមស្កៃនេះ មានបណ្ដោយ ៦២ម៉ែត្រ ទទឹង ៦០ម៉ែត្រ កម្ពស់ ៨ជាន់ និងមានផ្ទៃក្រឡាសរុបប្រមាណ ២៣,០៣៥ម៉ែត្រក្រឡា ព្រមទាំងបំពាក់ប្រព័ន្ធបណ្តាញតភ្ជាប់ផ្នែកបច្ចេកវិទ្យា សម្រាប់បម្រើការងារ ក្នុងបរិបទនៃការធ្វើឌីជីថលលូបនីយកម្មនាពេលខាងមុខផងដែរ។ បន្ទាប់ពីសាលាឧទ្ធរណ៍ និងមហាអយ្យការអមសាលាឧទ្ធរណ៍ភ្នំពេញ បានផ្លាស់ប្ដូរមកទីតាំងថ្មីនេះរួច ទីតាំងចាស់របស់សាលាឧទ្ធរណ៍ និងមហាអយ្យការអមសាលាឧទ្ធរណ៍ភ្នំពេញ ត្រូវបានប្រគល់ឱ្យក្រសួងយុត្តិធម៌វិញ ដើម្បីក្រសួងជួសជុលអគារចាស់ និងកសាងអគារថ្មីបន្ថែម សម្រាប់ជាទីកន្លែងបំពេញការងាររបស់មន្ត្រីនៃក្រសួងយុត្តិធម៌៕
