នគរបាលស្រុកអង្គស្នួល ឃាត់ខ្លួនជនសង្ស័យ ២នាក់ ករណីលួច អាគុយ

កណ្តាល៖ ប្រភពដែលទទួលបានពីលោកវរសេនីយ៍ឯក មាន សំណាង អធិការនគរបាលស្រុកអង្គស្នួលបានឱ្យអង្គភាព ‘’ អែស អរ អិន ‘’ យើងដឹងនៅរសៀលថ្ងៃទី០៦ ខែកក្កដាឆ្នាំ២០២៣នេះថា មានករណីលួច (អាគុយ)ពីជន រងគ្រោះឈ្មោះ កង វុទ្ធី ភេទប្រុស អាយុ៥៩ឆ្នាំ មុខរបរ លក់ដូរ កាលពីថ្ងៃទី០៥ ខែកក្កដា ឆ្នាំ២០២៣ វេលាម៉ោង០៣: ០០នាទី ស្ថិតនៅចំណុច តូបលក់ទឹកកក មួយកន្លែងនៅភូមិព្រៃភក្តី ឃុំព្រៃពួច ស្រុកអង្គស្នួល ខេត្តកណ្តាល។

លោកអធិការនគរបាលស្រុកអង្គស្នួលបានឱ្យដឹងទៀតថា ជនសង្សយ័មានចំនួន ០២នាក់រួមមាន៖

១-ឈ្មោះ លី នៅ ហៅឆែប ភេទប្រុស អាយុ១៨ឆ្នាំ មុខរបរ មិនពិត រស់នៅភូមិចំការគួយ ឃុំព្រៃពួច ស្រុកអង្គស្នួល ខេត្តកណ្តាល(ឃាត់ខ្លួន មានសារធាតុញៀនក្នុងទឹកនោម(+) ធ្លាប់ជាប់ពន្ធធានាគារចំនួន០២លើក ពាក់ព័ន្ធករណី: អំពើលួច(ដែក)ក្នុងឆ្នាំ២០១៨ រយៈពេល១០ខែ និងករណី: អំពើលួច(ម៉ាសុីនបូមទឹក)ក្នុងឆ្នាំ២០២០ រយៈពេល០៤ខែ )។

២-ឈ្មោះ ហ៊ាន ភារ៉ា ហៅតូនី ភេទប្រុស អាយុ២៤ឆ្នាំ មុខរបរ មិនពិត ស្នាក់នៅភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល (ឃាត់ខ្លួន មានសារធាតុញៀនក្នុងទឹកនោម(+) ធ្លាប់ជាប់ពន្ធធានាគារចំនួន០២លើក ពាក់ព័ន្ធករណី: អំពើលួច(ទូរសព្ទ)ក្នុងឆ្នាំ២០១៩ រយៈពេល០១ឆ្នាំ និងករណី: អំពើលួច(ម៉ាសុីនបូមទឹក)ក្នុងឆ្នាំ២០២០ រយៈពេល០៦ខែ )។

លោកអធិការបន្តឱ្យដឹងទៀតថា សម្ភារៈបាត់បង់មានអាគុយឡានដឹកទឹកកក N100អំពែរ ចំនួន០២គ្រាប់ ។ ក្នុងដែរសម្ភារៈបានចាប់យកម៉ូតូម៉ាក គុបជ្រុង ពណ៌ទឹកប៊ិត ពាក់ផ្លាកលេខ ភ្នំពេញ 1D-1592 , ដង្កាប់ចំនួន០១, កូនសោសម្រាប់ដោះគ្រឿងចំនួន០៥, ដែកទុលឡឺវីសចំនួន០១, ពឹលពាក់ក្បាល់ចំនួន០១, កាបូបស្ពាយពណ៌ខ្មៅចំនួន០១ ។

ប្រភពពីសមត្ថកិច្ចបានឱ្យដឹងទៀតថា កាលពីថ្ងៃទី០៤ ខែ កក្កដា ឆ្នាំ២០២៣វេលាម៉ោងប្រហែល០៣រសៀល មុនពេលកើតហេតុជនរងគ្រោះ បានបើកឡានត្រឡប់មកពីទិញទឹកកក នៅរោងចក្រផលិតទឹកកកនៅឃុំដំណាក់អំពិល ពេលមកដល់ផ្ទះជនរងគ្រោះក៏បានចតឡានទុកនៅមុខផ្ទះជួលរបស់ខ្លួន ។ លុះដល់ថ្ងៃកើតហេតុខាងលើ ជនរងគ្រោះក្រោកពីសម្រានរួចរៀបចំខ្លួនយកទឹកកកអោយម៉ូយហើយដើរសំដៅទៅឡើងឡានដឹកទឹកកករបស់ខ្លួន ស្រាប់តែឃើញកៅស៊ូទ្រាប់អាគុយឡានជ្រុះលើដី ភ្លាមនោះជនរងគ្រោះដើរមើលជុំវិញឡានទើបដឹងថាបាត់អាគុយឡានចំនួន០២គ្រាប់។ បន្ទាប់មកជនរងគ្រោះបានរាយការណ៍ទៅសមត្ថកិច្ចប៉ុស្តិ៍ព្រៃពួច ក្រោយពីទទួលបានពត៌មានភ្លាមកម្លាំងប៉ុស្តិ៍ព្រៃពួចបាន ចុះទៅដល់កន្លែងកើតហេតុ ហើយកំណត់មុខសញ្ញាបានទើបឈានដល់ការឃាត់ខ្លួនជនសង្ស័យទាំង០២នាក់ យកមកអធិការដ្ឋាននគរបាលស្រុក ដើម្បីសួរនាំតាមនីតិវិធី។

តាមចម្លើយសារភាពរបស់ជនសង្ស័យទាំង០២នាក់ បានឆ្លើយសារភាពថា ខ្លួនពិតជាបានធ្វើសកម្មភាពលួចយកអាគុយឡានទាំង០២គ្រាប់របស់ជនរងគ្រោះ ហើយលក់ទៅអោយអ្នកទិញអេតចាយបើករឺម៉កតាមភូមិ ពិតប្រាកដមែន បានលុយចំនួន១០០,០០០៛(មួយសែនរៀល)ហើយបានយកលុយទៅទិញថ្នាំញៀនដើម្បីប្រើប្រាស់ជាមួយគ្នា ហើយកន្លងមកជនសង្ស័យទាំង០២នាក់ និងបក្ខពួក០១នាក់ទៀតឈ្មោះ លី វីឡា ភេទប្រុស អាយុ៣២ឆ្នាំ មុខរបរ មិនពិត រស់នៅភូមិឆក់ឈើនាង ឃុំឆក់ឈើនាង ស្រុកអង្គស្នួល ខេត្តកណ្តាល ធ្លាប់ធ្វើសកម្មភាពលួច និងប្រើប្រាស់ថ្នាំញៀនជាមួយគ្នា ។

ចំពោះករណីនេះដែរ កម្លាំងផ្នែកជំនាញកំពុងកសាងសំណុំរឿងបន្តតាមនីតិវិធីច្បាប់ ៕ដោយ៖ សិរី នាគ