Breaking News

កម្ពុជាត្រូវការថវិកាប្រមាណ៩០លានដុល្លារទៀត ដើម្បីបោសសម្អាតមីន និងគ្រាប់មិនទាន់ផ្ទុះ ដែលសេសសល់

ភ្នំពេញ៖ លោកទេសរដ្ឋមន្រ្តី លី ធុជ អនុប្រធានទី១ នៃអាជ្ញាធរមីន បានអះអាងថា កម្ពុជាត្រូវការថវិកាប្រមាណ ៩០លានដុល្លារសហរដ្ឋអាមេរិកថែមទៀត ដើម្បីបោសសម្អាតមីន និងគ្រាប់មិនទាន់ដែលនៅសេសសល់លើផ្ទៃដីប្រមាណជិត២ពាន់គីឡូម៉ែត្រការ៉េ។

ការបញ្ជាក់របស់ លោកទេសរដ្ឋមន្រ្តី បានធ្វើឡើងនៅក្នុងសន្និសីទកាសែតមួយ នៅរសៀល ថ្ងៃទី០៧ ខែកក្កដា ឆ្នាំ២០២២នេះ ពាក់ព័ន្ធនឹងការអនុវត្តគម្រោងសម្តេចតេជោ សម្រាប់សកម្មភាពមីន «ផ្តល់ដីមានសុវត្ថិភាពបង្កើតស្នាមញញឹម»។

លោកទេសរដ្ឋមន្រ្តី លី ធុច បានបញ្ជាក់ដូច្នេះថា៖ «មួយម៉ែត្រការ៉េ សម្រាប់ការងារបោសសម្អាតមីននេះ យើងប្រើតែ ៩០០រៀល ឬ១ពាន់រៀលទេ អញ្ចឹងមួយ១ដុល្លារ យើងបោសសម្អាតមីនបាន៤ម៉ែត្រការ៉េ»។ លោកបានបន្តថា៖ «ចំនួនថវិកា បើយើងបោសសម្អាតចំនួននេះហើយ មិនតិចជាង៩០លានដុល្លារទៀតទេ ដែលយើងអាចវ៉ៃសម្រុកបានដើម្បីគ្មានមីននៅពេលខាងមុខនេះ»។

របាយការណ៍របស់អាជ្ញាធរមីន បានឱ្យដឹងថា គិតតាំងពីឆ្នាំ១៩៩២ មកដល់ខែឧសភា ឆ្នាំ២០២២ កម្ពុជាបានបោសសម្អាតមីន និងគ្រាប់មិនទាន់ផ្ទុះ លើផ្ទៃដីប្រមាណ ២៤១០គីឡូម៉ែត្រការ៉េ ដោយនៅសេសសល់ប្រមាណ ១៩៩២គីឡូម៉ែត្រការ៉េទៀត។ ប្រជាជនប្រមាណជាង៥ម៉ឺននាក់បានរងគ្រោះដោយសារមីន ខណៈជិត២ម៉ឺននាក់ បានស្លាប់ និងជា៩ពាន់នាក់ពិការ។

លោកទេសរដ្ឋមន្រ្តី បានបញ្ជាក់បន្ថែមថា «៣០ឆ្នាំមុន ទោះបីជាប្រទេសយើងតូចក៏ដោយក្រក៏ដោយ យើងចំណាយជាង២០០លានដុល្លារសហរដ្ឋអាមេរិក គាំទ្រដល់ការងារបោសសម្អាតមីន ដោយសារសម្តេចចង់បានឱ្យប្រជាជនយើងរស់នៅមានសុខសន្តិភាព មានសុខដុមរមនា ប្រទេសជាមិត្តបានចូលរួមជាង៤០០លានដុល្លារសហរដ្ឋអាមេរិក»។

កាលពីពេលថ្មីៗនេះ សម្តេចតេជោ ហ៊ុន សែន បានដាក់ចេញនូវយុទ្ធនាការកៀរគរថវិកាពីសប្បុរសជន ដើម្បីបោសសម្អាតមីន និងគ្រប់មិនទាន់ផ្ទុះឱ្យអស់ពីប្រទេសកម្ពុជា តាមការគ្រោងទុកនៅឆ្នាំ២០២៥ ខាងមុខនេះ។ បន្ទាប់ពីការដាក់ចេញយុទ្ធនាការនេះ មានសម្បុរសជនជាច្រើនបានចូលរួមបរិច្ចាគតាមលទ្ធភាព។

បើតាម លោកទេសរដ្ឋមន្រ្តី លី ធុច មានសប្បុរសជនប្រមាណ១ម៉ឺននាក់ហើយ បានចូលរួមបរិច្ចាកថវិកានេះដោយក្នុងនោះចាប់ពី១ដុល្លារផងដែរ។ លោកបានអំពាវនាវដល់ពលរដ្ឋដែលមិនទាន់បានចូលរួមបរិច្ចាគជាមួយនឹង ជាមួយមហាចលនាជាតិនេះ សូមឱ្យជួយចូលរួមទាំងអស់គ្នា ដើម្បីសង្គ្រោះពលរដ្ឋពីមីន ហើយផ្តល់ដីសុវត្ថិភាពបង្កើតនូវស្នាមញញឹមដល់ពួកគាត់៕

 

Check Also

អភិបាលខេត្តកណ្តាលជំរុញរដ្ឋបាលក្រុងយកចិត្តទុកដាក់ការចុះបញ្ជីដីធ្លីនិងការពារទឹកដីតាមព្រំដែន

Leave a Reply

Your email address will not be published. Required fields are marked *