គណៈកម្មាធិការគ្រប់គ្រងគ្រោះមហន្តរាយ ខេត្តពោធិ៍សាត់ បង្ហាញពីផលប៉ះពាល់បឋម នៃទឹកជំនន់

(ពោធិ៍សាត់)៖ គណៈកម្មាធិការគ្រប់គ្រងគ្រោះមហន្តរាយ ខេត្តពោធិ៍សាត់ នាថ្ងៃទី០៨ ខែតុលា ឆ្នាំ២០២២នេះ បានបង្ហាញពីរបាយការណ៍ផលប៉ះពាល់បឋម នៃទឹកជំនន់ គិតត្រឹមថ្ងៃទី០៧ ខែតុលា ឆ្នាំ២០២២។

ក្នុងរបាយការណ៍នោះបានបញ្ជាក់ថា បន្ទាប់ពីទទួលរងឥទិ្ធពលសម្ពាធទាប (ITCZ) និងមានភ្លៀងធ្លាក់ខ្លាំងជាប់ៗគ្នានោះ ក្នុងភូមិសាស្រ្តខេត្តពោធិ៍សាត់ គិតចាប់ពីថ្ងៃទី០៣ ដល់ថ្ងៃទី០៧  ខែតុលា ឆ្នាំ២០២២ បានបង្កឱ្យមានគ្រោះទឹកជំនន់ដងស្ទឹងពោធិ៍សាត់ នៅក្នុងក្រុងពោធិ៍សាត់ និងស្រុកកណ្តៀង។

ទី១-ក្រុងពោធិ៍សាត់ ទទួលរងប៉ះពាល់៖

-ប្រជាពលរដ្ឋ ចំនួន១១៣៨ខ្នងផ្ទះ (ទឹកចូលក្រោមផ្ទះ)

-ផ្លូវទឹកហូរកាត់ សរុបចំនួន៥៩ខ្សែ ស្មើនឹង៥៧,៧០០ម៉ែត្រ (ផ្លូវកៅស៊ូ ចំនួន១២ខែ្ស ស្មើនឹង៦២៥០ម៉ែត្រ, ផ្លូវគ្រួសក្រហមចំនួន៣០ខ្សែ ស្មើនឹង៣៦១០០ម៉ែត្រ និងផ្លូវដីស ចំនួន១៧ខែ្ស ស្មើនឹង១៥៣៥០ម៉ែត្រ)

-ដំណាំស្រូវ ចំនួន៤០០ហិកតា និងខូចខាត់២១៧ហិកតា និងដំឡូងមី ៤,៥០ហិកតា

-សាលារៀន ចំនួន០៥កន្លែង និងវត្ត ចំនួន០១កន្លែង

-អគាររដ្ឋបាលអធិការក្រុងពោធិ៍សាត់ ចំនួន០១កន្លែង។

ទី២-ស្រុកកណ្តៀង ទទួលរងប៉ះពាល់៖

-ប្រជាពលរដ្ឋ ចំនួន៣៦០គ្រួសារ (ទឹកចូលក្រោមផ្ទះ)

-ខូចខាតស្រូវ ចំនួន៦៩៦ហិកតា

-ទឹកហូរលើផ្លូវ ចំនួន៧,១០២ម៉ែត្រ និងហូរច្រោះដាច់ ចំនួន១០២ម៉ែត្រ 

-បាក់ច្រាំងស្ទឹង ចំនួន៧កន្លែង ប្រវែង១២៧ម៉ែត្រ។

ក្នុងរបាយការណ៍នោះបានបន្ថែមថា ក្រោមកិច្ចចង្អុលការណ៍ របស់ឯកឧត្តម ជាវ តាយ អភិបាលនៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានប្រើប្រាស់កម្លាំងសរុប មធ្យោបាយសរុប រួមមាន៖ អាជ្ញាធរស្រុក ក្រុង ឃុំ​ សង្កាត់ និងភូមិ រួមទាំងកម្លាំងយុវជនស្ម័គ្រចិត្ត អន្តរាគមន៍បានទាន់ពេលវេលា ពុំមានផលប៉ះពាល់ធ្ងន់ធរ ដល់អាយុជីវិតប្រជាពលរដ្ឋ ឬសត្វពាហៈនៈនោះឡើយ។

គិតត្រឹមព្រឹកថ្ងៃទី០៨ ខែតុលា ឆ្នាំ២០២២នេះ ទឹកស្ទឹងពោធិ៍សាត់ មានកម្ពស់៥,៤៥ម៉ែត្រ បានស្រកចំនួន៥ហ៊ុន (កម្ពស់ប្រកាសអាសន្ន ៥ម៉ែត្រ), ស្ទឹងភ្នំក្រវាញ មានកម្ពស់៣,៤៥ម៉ែត្រ បានស្រកចំនួន០,៥ម៉ែត្រ (កម្ពស់ប្រកាសអាសន្ន ៦ម៉ែត្រ) និងស្ទឹងវាលវែង មានកម្ពស់១,៤០ម៉ែត្រ បានស្រកចំនួន០,៥ម៉ែត្រ (កម្ពស់ប្រកាសអាសន្ន ៩ម៉ែត្រ)។ ក្នុងករណីនៅស្រុកភ្នំក្រវាញ ពុំមានភ្លៀងនៅល្ងាចនេះ ឬយប់នេះទេ ទឹកស្ទឹងនឹងបន្តស្រកចុះជាបន្តបន្ទាប់៕