ប្រតិកម្មរបស់រុស្ស៊ី ក្រោយមន្ត្រីជាន់ខ្ពស់ជាច្រើន ត្រូវអ៊ុយក្រែន​ចេញនិវាទក្រហមតាមចាប់ខ្លួន

ប្រមុខដឹកនាំគណៈកម្មការ ស្រាវជ្រាវរបស់រុស្ស៊ី លោក Aleksey Bastrykin បានចេញបញ្ជា បើកការស្រាវជ្រាវ ពាក់ព័ន្ធ នាយករដ្ឋានសន្តិសុខជាតិអ៊ុយក្រែន (SBU) ប្រកាសដាក់អតីតប្រធានាធិបតី Dmitry Medvedev ក្នុងបញ្ជីឈ្មោះតាមចាប់ខ្លួន។

សារព័ត៌មាន AFP នៅថ្ងៃអង្គារ ទី១១ ខែតុលា ឆ្នាំ២០២២បានផ្សាយថា នាយកដ្ឋានសន្តិសុខអ៊ុយក្រែន SBU បាននិយាយថាអតីតប្រធានាធិបតីរុស្ស៉ី លោក Dmitry Medvedev បានស្ថិតនៅក្នុងបញ្ជី ឈ្មោះនៃក្រុមមនុស្សដែលអាជ្ញាធរសន្តិសុខអ៊ុយក្រែនស្វែងរកតាមចាប់ខ្លួន អស់រយៈពេលជាងកន្លះឆ្នាំមកហើយ។

នៅក្នុងសេចក្ដីថ្លែងការណ៍ចេញផ្សាយកាលពីថ្ងៃចន្ទដើមសប្ដាហ៍នេះ សេវាសន្តិសុខអ៊ុយក្រែន SBU បានបញ្ជាក់ទៀតថាលោក មេដវេដេវ ដែលបច្ចុប្បន្ន ជាអនុប្រធានក្រុមប្រឹក្សាសន្តិសុខរុស្ស៉ី បានស្ថិតនៅក្នុងបញ្ជីតាមចាប់ខ្លួន នៅក្រោមផ្នែកមួយនៃក្រមព្រហ្មទណ្ឌពាក់ព័ន្ធនឹងការព្យាយាមបំផ្លាញបូរណភាព ទឹកដី និងតំបន់ព្រំដែនមិនអាចបំពានបានរបស់អ៊ុយក្រែន។

បន្ថែមពីលើនេះ បើតាមសេចក្ដីថ្លែងការណ៍នេះដដែល សមាជិកក្រុមប្រឹក្សាសន្តិសុខរុស្ស៉ីភាគច្រើនសុទ្ធតែមានឈ្មោះនៅក្នុងបញ្ជីតាមចាប់ខ្លួនរបស់ អ៊ុយក្រែន ព្រមទាំងមន្ត្រីជាន់ខ្ពស់រុស្ស៉ីមួយចំនួនទៀត ក្នុងនោះរួមមានរដ្ឋមន្ត្រីការពារជាតិរុស្ស៉ី លោក Sergei Shoigu និងលោក Patrushev ជាប្រធានក្រុមប្រឹក្សាសន្តិសុខរុស្ស៉ីផងដែរ។ ប៉ុន្តែ ភ្លាមៗ គេមិនទាន់ដឹងច្បាស់ថាតើហេតុអ្វីបានជាអាជ្ញាធរ អ៊ុយក្រែនទើបតែបញ្ចេញបញ្ជីឈ្មោះខាងលើជាសាធារណៈនៅពេលនេះនោះទេ៕