ជាលើកដំបូងក្នុងប្រវត្តិសាស្ត្រ អាមេរិកមានបំណុលសាធារណៈរហូតដល់ទៅ ៣១ ពាន់ ពាន់លានដុល្លារ​

ក្រសួងហិរញ្ញវត្ថុអាមេរិក បានបញ្ជាក់ថា គិតត្រឹមថ្ងៃទី​ ៣ ខែតុលា ឆ្នាំ ២០២២ បំណុលសាធារណៈរបស់អាមេរិកបានកើនឡើងដល់ទៅ​៣១ពាន់ ពាន់លានដុល្លារ ដែលជាបំណុលខ្ពស់បំផុតក្នុងប្រវត្តិសាស្ត្រ។

តាមតួលេខរបស់ក្រសួងហិរញ្ញវត្ថុអាមេរិក បំណុលអាមេរិកសរុប មាន31.123.887.781.401, 34 USD (ជាង ៣១ ពាន់ ពាន់លានដុល្លារ)។ ក្នុងអំឡុងពេលប្រធានាធិបតីអាមេរិក ឡើងកាន់អំណាច នៅខែមករាឆ្នាំ​២០២១ ​បំណុលសាធារណៈអាមេរិក មានត្រឹមតែ ជាង​ ២៧,៧  ពាន់ ពាន់លានដុល្លារតែប៉ុណ្ណោះ។

តំណាងរាស្ត្រអាមេរិកមកពីរដ្ឋ​តិចសាស លោក Chip Roy បង្ហាញពីក្តីបារម្ភនៅលើបណ្តាញ Twitter ​របស់ខ្លួនថា «កាលពី៥ឆ្នាំមុន បំណុលសាធារណៈរបស់អាមេរិក មានតែ ២១ពាន់ ពាន់លានដុល្លារ ប៉ុណ្ណោះ តែពេលនេះ បានកើនឡើងខ្ពស់​»។

បំណុលសាធារណៈរបស់អាមេរិក មាន ១៩,៩ពាន់ពាន់លានដុល្លារ  ក្នុងពេលដែលលោក ដូណាលត្រាំ កាន់តំណែងប្រធានាធិបតីអាមេរិក នាឆ្នាំ​២០១៧​។ ប៉ុន្តែប៉ុន្មានឆ្នាំចុងក្រោយនេះ បំណុលរបស់អាមេរិកបានកើនឡើងខ្ពស់ ដោយសារតែ ធនាគារកណ្តាលអាមេរិក បន្ថេមប្រាក់ដើម្បីទប់ទល់ជាមួយ​កូវីដ​១៩ ។

ក្នុងចំណោមបំណុលធាសារណៈទាំងនោះ  បំណុលលើពលរដ្ឋអាមេរិក ២៤ពាន់ពាន់លានដុល្លារ ។ ជាមួយគ្នានេះដែរ បំណុលបរទេស មានជាង ៧ពាន់ពាន់លានដុល្លារ​ ក្នុងនោះមានទាំងប្រទេសចិន ដែលជាម្ចាស់បំណុលរបស់អាមេរិកផងដែរ ៕